Бүгүн, муус устар 24 күнүгэр, П.И. Сивцев аатынан история уонна этнография түмэлин култуура саалатыгар РСФСР норуотун үөрэҕириитин туйгуна, Саха АССР култууратын үтүөлээх үлэһитэ, Россия суруналыыстарын Сойууһун чилиэнэ, республика суруналыыстарын «Кыһыл көмүс бөрүө», «Саха» НКИХ суруналыыстарын Сэбиэскэй Сойуус Геройа Н.А. Кондаков аатынан Государственнай, поэт Н.М. Рыкунов аатынан улуус суруналыыстарын бириэмийэлэрин лауреата, Нам улууһун, Таастаах нэһилиэгин Ытык киһитэ, кыраайы үөрэтээччи Иннокентий Захарович Кривошапкиҥҥа анаммыт экспозиция үөрүүлээхтик аһылынна. Манна Дьокуускай куораттан ыҥырыылаах ыалдьыттар, кини оҕолоро, сиэннэрэ, аймахтара, улуус дьаһалтатын эппиэттээх үлэһиттэрэ, тэрилтэлэр салайааччылара, бииргэ алтыспыт дьонноро, улуус общественноһа кыттыыны ылла. Бу тэрээһин Иннокентий Захарович Кривошапкин төрөөбүтэ 90 сылыгар ананна.
Бэлиэ түгэҥҥэ Намын улууһугар учууталтан саҕалаан, араас салайар дуоһунастарга эҥкилэ суох үлэлээн ааспыт, үөрэх, култуура, кыраайы үөрэтии, олох сайдарыгар сүҥкэн кылаатын киллэрбит, дьоһун олоҕу олорбут, Эҥсиэли хочотун саарынын И.З. Кривошапкины истиҥник ахтан туран, салайбыт түмэлигэр экспозиция ананан тубутугар эҕэрдэлэрин тиэртилэр: Нам улууһун баһылыгын солбуйааччы Юрий Дьяконов, улуустааҕы депутаттар сэбиэттэрин бэрэссэдээтэлэ Алексей Винокуров.
Экспозиция бүрүөһүнүн И.З. Кривошапкин ыкса доҕоро, РСФСР үтүөлээх, Россия народнай артыыһа, СӨ народнай артыыһа, опернай ырыаһыт Иван Степанов кини сиэннэрин Иннокентий, Николай Кривошапкиннары кытта, дохсун ытыс тыаһынан, арыйдылар. Иван Прокопьевич үтүөтүк саныыр күндү киһитин, биллэҕин, туһунан иһирэхтик ахтан туран, түмэлгэ ырыалара түмүллүбүтүн дискэтин, кинигэни бэлэх уунна уонна бас куолаһынан ырыа ыллаан доллоһутта.
Тэрээһини сүрүннээбит түмэл дириэктэрэ Александр Копырин бу эйгэҕэ сыһыарбыт истиҥник саныыр салайааччытын, настаабынньыгын айар үлэтин, олоҕун кэпсиир экспозиция мэлдьи турарга анал миэстэтин булбутун, И.З. Кривошапкин сырдык аатын үйэтитэн ыччакка, дьоҥҥо-сэргэҕэ, көрөөччүгэ тиэрдии буоларын бэлиэтээтэ. Быыстапкалыыр саала сэбиэдиссэйэ Рустам Федоров мустубуттарга экспозицияны сиһилии сырдатта, бары сэргии-сэҥээрэ иһиттилэр, көрдүлэр.
Салгыы “Алаас ааттаах, үтүө киһи үйэлээх” төгүрүк остуол тэрилиннэ. Иһирэх ахтыы тэрээһинигэр тыл этээччилэр бары да Иннокентий Захарович Кривошапкины үтүөтүк, сылаастык аҕыннылар. Киһи быһыытынан сэмэйин, билиитэ-көрүүтэ киэҥин, киһи киһитэ буоларын бэлиэтээтилэр. Ханна да үлэлээтэр ыллыктаах сүбэтэ, муударай санаата, ыччаты үлэҕэ такайыыта барыта улууһун сайдарыгар, дьонун туһугар олоҕун анаабыта ахтылынна. Улууспутугар эрэ буолбакка, өрөспүүбүлүкэҕэ билиниини, ытыктабылы ылбыт тумус туттар киһибитинэн бары да киэн туттабыт.
Төгүрүк остуолга улууска Дьиэ кэргэн экономикатын Сыла биллэриллибитинэн уонна И.З. Кривошапкин төрөөбүтэ 90 сылынан “Бигэ туруктаах дьиэ кэргэн” видеокиинэ улуустааҕы куонкуруһа бу сыл устата ыытыллара этилиннэ.
Инникитин да былааҥҥа Иннокентий Захарович хомуйбут архыыбын, культурнай нэһилиэстибэтин үөрэтии, кини айар үлэтин, олоҕун туһунан документальнай киинэни саҥардан устуу, үүнэр көлүөнэҕэ тиэрдии, холобур буолар олох нөҥүө төрөөбүт кыраай историятын үөрэтии, чинчийии үлэтин кэҥэтии, музейдарга, ытык сирдэргэ сырытыннарыы, билиһиннэрии о.д.а. көрүүлэр, торумнар бааллара бэлиэтэннэ.
Киһи киэнэ кэрэтэ, кэрэмэһэ Иннокентий Захарович Кривошапкин эппит этиитэ, саҥарбыт саҥата, бичийэн чөкөппүт үлэтэ үйэлэргэ кинини ааттата уонна дуораһыта туруо.
Касьян Олесов-Олук.
Видеоҕа опернай ырыаһыт Иван Степанов.