2025 сылга “Эҥсиэли” хаһыат 90 сылын бэлиэтиир. Ол чэрчитинэн оскуола үөрэнээччилэригэр хаһыаты билиһиннэрэр акциябыт салҕанар. Бүгүн Е.С. Сивцев – Таллан Бүрэ аатынан Бөтүҥ орто оскуолатыгар ыалдьыттаатыбыт, оскуола үөрэнээччилэрин кытта көрүстүбүт.
“Эҥсиэли” хаһыат корреспондена, Россия суруналыыстарын сойууһун чилиэнэ Касьян Олесов хаһыат историятын, билиҥҥи үлэтин, бэтэрээн суруналыыстары билиһиннэрдэ. Оҕолорго кырдьаҕас суруналыыс Григорий Эверстов-Тыыппалаах суруйбут “Тылга тииспит билэр дьонум” уонна хаһыат уопуттаах суруналыыстара киирбит “Саха сирин суруналыыстара” кинигэлэри көрдөрдө. Шеф-редактор Дарина Константинова оҕолорго хаһыат социальнай ситимҥэ: сайтка, телеграм каналга, в контакте, одноклассники ыытар үлэтин сырдатта.
Хаһыаппыт эрэллээх көмөлөһөөччүтэ, общественнай корреспондеммыт “Хатыҥ Арыы нэһилиэгэ” МТ специалиһа Надежда Сивцева – Намыына бэйэтин үлэтин уопутун кэпсээтэ, үлэтин муспут паапкаларын оҕолорго көрдөрдө, хайдах суруйарга сүбэ-ама биэрдэ.
Бөтүҥ оскуолатын оҕолоро эбээлэрэ-эһээлэрэ “Эҥсиэли” хаһыаты суруйтаралларын, бэйэлэрэ сайтка уонна телеграм каналга тугу сөбүлээн ааҕалларын эттилэр. Мустубут оҕолортон үгүстэрэ саха тылын, литературатын учуутала Татьяна Протопопова салайар, айар дьоҕуру сайыннарар “Хотойук” куруһуокка уонна алын кылаас учуутала Уруйдаана Заровняева ыытар, оскуола олоҕун сырдатар медиа бөлөҕөр дьарыктаналларын биллибит. Кэпсэтии кэмигэр үөрэнээччилэр оскуола социальнай педагогун Людмила Михайлованы кытта хаһыакка биир дойдулаахтарын Бөтүҥнэр тустарынан булан аахтылар. Хаһыаппытын сэҥээрбиттэриттэн астынныбыт. Үөрэнээччилэргэ инникитин “Эҥсиэли” хаһыакка сонуннары суруйалларыгар баҕа санаабытын тиэртибит. Биһиэхэ 11 кылаас үөрэнээччитэ, үрдүкү кылаастар сэбиэттэрин президенэ Ярослав Сивцев үөрэх таһынан дьарыктарын сырдатта.
“Эҥсиэли” хаһыаппыт тэриллиэҕиттэн 90 сыл устата бириэмэни, кэми кытта тэҥҥэ хардыылыыр. Хаһыаппыт историята – дойдубут, өрөспүүбүлүкэбит уонна саамай сүрүнэ – улууспут историята буолар. Инникитин да
хаһыаппытын билиһиннэрэр акция салҕаныаҕа.
Касьян Олесов,
Дарина Константинова
?Роман Шапошников