Бүгүн бүтүн Россиятааҕы «Зарница 2.0» байыаннай-патриотическай оонньуу региональнай түһүмэҕин үөрүүлээх быһыыга-майгыга аһыллыыта Намнааҕы педагогическай колледжка буолан ааста.
Үөрүүлээх аһыллыыга СӨ ыччат дьыалаларыгар уонна социальнай коммуникацияларга миниистирин эбээһинэһин толорооччу, Россия Дьоруойа Игорь Юргин, Нам улууһун баһылыгын солбуйааччы Егор Протопопов, бойобуой дьайыы бэтэрээннэрин ассоциациятын председателэ, “Боотур” доброволецтар этэрээттэрин салайааччыта Иван Черкашин, “Воин” байыаннай-спортивнай бэлэмнэнии уонна патриотическай иитии киинин дириэктэрин солбуйааччы Афанасий Сергин уо.д.а. кэлэн эҕэрдэ тыл эттилэр.
«Зарница 2.0» байыаннай-патриотическай күрэххэ орто үөрэх устудьуоннара 23 хамаанданан кыттыыны ылаллар. Хамаандалар 7 араас көрүҥүнэн Намнааҕы педагогическай колледж спорт саалатыгар уонна пааркатыгар 3 күн күрэхтэһэллэр: дроннары көтүтүү күрэҕэ, таһырдьа тактическай оонньуу, электроннай планшеттарга маршрут оҥоруу, сапердар, штурмовиктар, политруктар уонна медиктэр күрэхтэрэ, ону тэҥэ социальнай ситимнэргэ военкордар “Зарница” оонньууну сырдатыахтара, ол түмүккэ сыаналаныа.
Дарина Константинова