Дьокуускай куоракка балаҕан ыйын 9-10 күннэригэр Нам улууҺун делегацията Кыайыы 80 сылыгар аналлаах «Гражданское общество: консолидация во имя Победы» тиэмэлээх гражданскай форумҥа кыттыыны ылла.
Хамаҕаттаттан Нам улууһун дьиэ кэргэн политикатын отделын кылаабынай специалиһа Розалия Новгородова, общественниктар В.П. Артамонов аатынан саха-француз лицей социальнай педагога, “Үрдэл” түөлбэ салайааччыта Люция Ушницкая, «Тускул” уһуйаан методиһа, нэһилиэк дьахтар сэбиэтин председателэ Саргылана Индеева кыттыыны ыллылар. Форумҥа тугу дьүүллэспиттэрин туһунан Люция Ушницкая:
«Икки күн араас дискуссионнай площадкалар үлэлээтилэр. Биһиги «Многопоколенная семья – традиция и ценность жизни» площадкаҕа кытынныбыт. Площадка сыала: дьиэ кэргэни кытта араас тэрилтэлэр, общественнай түмсүүлэр алтыһыыларын бастыҥ уопутун тарҕатыы, элбэх көлүөнэлээх дьиэ кэргэн бодоруһуутун тупсарыы, дьиэ кэргэн обществоҕа бөҕө туруктаах буолуутун ситиһии.
Бу площадкаҕа кыттыыны ыллылар экспертэр, араас идэлээх специалистар, общественнай түмсүүлэр лидердэрэ. Ол курдук, Саха республикатын Ил Түмэн бэрэссэдээтэлин солбуйааччыта Афанасий Семенович Владимиров дьиэ кэргэн төрүччүтүн үөрэтиитэ үрдээн иһэрин, манна библиотекалар «Древо жизни» программаны туһаналларын, төрүччүнү билии патриотическай иитии төрдө буоларын бэлиэтээтэ. Дьокуускай куорат элбэх оҕолоох ийэлэр түмсүүлэрин салайааччыта Галина Аркадьевна Сидорова хас биирдии элбэх оҕолоох дьиэ кэргэн өйөбүлү туһаныахтаах, биһиги түмсүүбүт дьиэ кэргэн политиката сайдарыгар оруоллах диэн санаатын эттэ.
Нам улууһун Партизан нэһилиэгиттэн Саха республикатын бастыҥ үлэҺит династиялар Бочуоттаах кинигэтигэр киирбит Баишевтар дьиэ кэргэнтэн Баай Кыталыына Бүөтүр кыыһа тыа хаһаайыстыбатынан үһүс көлүөнэ дьарыктанарын, уопсай үлэ ыстаастара 314 сыл буолбутун, кинилэр дьарыктара нэһилиэк сайдыытыгар улахан оруоллааҕын киэн тутта билиһиннэрдэ. Дьиэ кэргэҥҥэ духуобунай, сиэр-майгы өттүнэн иитиигэ кинигэни таптааччылар түмсүүлэрин салайааччыта Любовь Дмитриевна Аргунова-Айар Кут аан бастаан киин куоракка «Книговорот в старом городе» фестиваль тэрийэн ыыппыттарын иһитиннэрдэ. Медицинскэй наука кандидата, ХИФУ медицинскэй институтун профилактическай медицина кафедратын доцена Анастасия Дмитриевна Саввина дьиэ кэргэҥҥэ чөл олох сыаннастарын иҥэриини кэпсээтэ. Психологическай наука кандидата Евдокия Анатольевна Неустроева куйаар ситимин дьайыытын, төрөппүт уонна оҕо цифровой дуогабар түһэрсиэхтэрин сөбүн дириҥник ырытта.
Экономическай наука кандидата Анастасия Спиридоновна Барашкова республикабытыгар демографическай балаһыанньаны, дьиэ кэргэн ахсаанын састааба аччаан иһэрин кэтээн көрүүнү билиһиннэрдэ. Иһитиннэриилэр кэннэ форум кыттааччылара бэйэлэрин санааларын, этиилэрин киллэрдилэр.
Форум пленарнай чааһыгар бастыҥ общественнай түмсүүлэр көхтөөх дьоннорун наҕараадалааһын буолла, араас хайысханан ыытыллыбыт дискуссионнай площадкалар резолюцияҕа киирэр рекомендацияларын эттилэр.
Ити курдук, гражданскай форумҥа бастыҥ уопуттары көрдүбүт-иһиттибит уонна ылбыт билиибитин үлэбитигэр туһаныахпыт диэн санаалаах кэллибит».
Мария Винокурова, Хамаҕатта