Хабылык, хаамыска сайдарыгар кылаат биэрэр чемпионат

Нам улууһун хабылыксыттара Никольскай нэһилиэгэр спортивнай сезону улуус чемпионатынан астылар.

Барыта 9 нэһилиэк 8-тыы кыттааччылаах хамаандалара хабылыкка, 5-тээх, 7-лээх хаамыскаҕа, умсаахха күрэхтэстилэр.

Чемпионат стахановец, сэрии ветерана Охлопков Василий Иннокентьевич кэриэһигэр ананна. Чемпионат үөрүүлээх аһыллыытыгар “Никольскай МТ” баһылыга Алексей Кривогорницын, спорт уонна физическэй култуура управлениетын начальнига Павел Иванов тыл эттилэр. Василий Охлопков кыыһа Зинаида Нератова аҕатын туһунан ахтыы оҥордо. Хабылыксыттар үбүлүөйдээх сааһын туолбут ветеран оонньооччу Любовь Бесчетнованы эҕэрдэлээтилэр.

6 остуолунан республика федерациятын судуьуйалара Элеонора Николаева, Альбина Аммосова, Наталья Никифорова, Владимир Кетехов, Надежда Сокольникова дьүүллээтилэр. Чемпионат секретара Саргылана Комина протоколлары чуолкайдык толорон, көрдөрүүгэ таһааран истэ.

Күрэхтэһии кэнниттэн спорт маастардара маастар-кылаас көрдөрдулэр, сүбэлээтилэр.

Түмүккэ, Рената Захарова, Надежда Прокопьева ирдэммит көрдөрүүлэри толорон 20 тыһ. суумалаах сертификат туттулар. Биирдиилээн түмүккэ чемпионнар, призердар мэтээллэринэн, грамоталарынан наҕараадаланнылар.

Хамаанданан түмүкэ 1-кы Хомустаах чемпионнаата, иккис Хамаҕатта, 3-кэ хаачыстыбанан баһыйан Ленскэй нэһилиэк таҕыста. Кыайыылаах хамаандалар кубогынан, грамотанан, Охлопковтар дьиэ кэргэттэрэ туруорбут харчынан, бириистэринэн наҕараадаланнылар.

Улуус хабылыксыттара Василий Иннокентьевич Охлопков оҕолоругар, сиэннэригэр, бары аймахтарыгар хабылык, хаамыска сайдарыгар кылааттарын, өйөбүллэрин иһин махталбытын тиэрдэбит.

Маргарита Охлопкова

Читайте дальше