Нам улууһун Хамаҕаттатыгар бүгүн, балаҕан ыйын 24 күнүгэр, элбэх функцияны толорор спортивнай площадканы үөрүүлээх быһыыга-майгыга астылар.
2024 сыллаахха Хамаҕатта нэһилиэгин дьаһалтата «Формирование комфортной городской среды» федеральнай программаҕа кыттарга сананан, улуус дьаһалтатыгар үлэлээбит главнай архитекторын Анна-Мария Степанованы кытары «Ыччат ыллыга» проекка ыкса үлэлэһэн олоххо киллэрбиттэрэ. Нэһилиэк дьаһалтата былырыын «Ыччат ыллыгын» салгыы сайыннарар сыаллаах «Элбэх хайысхалаах спортивнай площадка» бырайыагы оҥорон ити федеральнай программаҕа кыттан эмиэ кыайылаах тахсыбыта. Ол түмүгэр 2-с түһүмэххэ, ортотунан, 15 мөл. солк. суумалаах саҥа тутууну ыытан олоххо киллэрдилэр. Ол курдук, 30м.х40м. иэннээх спортивнай площадка ортотугар футболлуур хонуулаах, кытыытыгар сүүрэр суоллаах, эргиччи үрдүк эрэһээҥкилээх, аллеяттан үргүлдьү барар тротуардаах. «Ыччат ыллыгын» кытта холбуу күрүөтэ оҥоһуллубут. Площадкаттан аллаея диэки барыыга тимир сеткалардаах 2 теннис остуола, кыра навес анныгар 2 саахымат оонньуур остуоллар, сэргэстэһэ бетоннаммыт площадкаҕа Россияҕа киэҥник биллэр «Романа» тэрилтэ оҥорор уулусса тренажердарын туруорбуттар.
Тэрээһиҥҥэ «Нам улууһа» МО баһылыга Юрий Слепцов, быһаччы үлэлэспит тэрилтэлэр ыҥырыылаах ыалдьыттара кыттыыны ыллылар. Нэһилиэк олохтоохторо, оҕолоро, ыччат, аҕам саастаахтара уруйдуу-айхаллыы кыттыыны ыллылар. Иккис түһүмэх үлэтин Семен Кривогрницын бэдэрээтчиктээх үлэни түмүктээтэ.
Улуус баһылыга Юрий Слепцов элбэх функциялаах площадкаҕа футболуур мээчигиги бастакынан тэптэ. Улуус дьаһалтатын аатыттан мээчиктэри уонна формалары туттарда.11
Бу күн «Олимпик» спорт оскуолатын уонна үөрэнээччилэргэ улуус сүүмэрдэммит хамаандатын холбоһуктаах, Хамаҕатта нэһилиэгин чиэһин урукку сыларга көмүскээбит хамаандалара доҕордоһуу түһүлгэлэрин олохтоотулар.
Семен Аргунов