Хамаҕатта олохтоох библиотекатыгар ыам ыйын 16 күнүгэр “Библионочь-2024” тэрээһин буолан ааспыт. Күн саҕаланыаҕыттан библиотекаҕа оскуола үөрэнээччилэригэр уонна улахан дьоҥҥо “Ааҕар чаас” уруоктан саҕаламмыт.
Ол курдук, оҕолор уонна улахан дьон 1937 сыллаахха тахсыбыт латыынныы суруктаах KYNNYK UURASTЬЬRAB “40 ЬRЬA” кинигэ тула санаа атастаспыттар, уларса сылдьан ааҕан холоммуттар.
Хамаҕатта олохтооҕо Сандаара Оротоо “Монотопия” техниканан уруһуйга 2 уонна 7 кылаас үөрэнээччилэригэр маастар кылаас ыыппытын библиотека сэбиэдиссэйэ Марина Корякина этэр.
Дьиэ кэргэн сылынан “Күн эгэлгэ” коллекционердар түмсүүлэрэ дьиэ кэргэн реликвията буолбут малларын быыстапката турбут. Маргарита Охлопкова “Обеденный сервиз с историей” диэн 1940-с сылларга туттубут иһиттэрин а5албыт. Оттон Надежда Макарова “Коровушки” коллекцията, Люция Ушницкая дьиэ кэргэнэ 1920-с үйэҕэ саамай сөбүлээн аахпыт, күннээҕи олохторугар туттубут кинигэлэрин көрдөрбүт. Матрена Жиркова “Парные статуэтки” диэн олус кыраһыабай коллекциятын кэлбит дьон барыта сэҥээрбит.
“Бүгүҥҥү ыалдьыт” рубрикаҕа “Кэрэ умсулҕана” иистэнньэҥнэр түмсүүлэрин кытта көрсөн, үлэлэрин билсэн истиҥ кэпсэтии тахсыбыт.
Дьиэ кэргэн сылынан библиотекаҕа “Книжки-самоделки” диэн уһуйаан оҕолоро төрөппүттэрин кытта бииргэ оҥорбут кинигэлэрин быыстапката турбут.
Ону тэҥэ, ол күн араас сибэкки рассадата атыыламмыт, хайдах сибэккини элбэтэри, ханна, хайдах олордор ордугун, тугунан хаһан аһатары Сардана Новгородова, Ксения Слепцова кэпсээн сүбэлээбиттэр.
“Дьоһун саас” пенсионердар түмсүүлэрэ күрэх тэрийбит. Ол курдук, күрэхтэһээччилэр корнхоллга киирсибиттэриттэн, Григорий Зырянов кыайыылааҕынан ааттанан харчынан наҕараадаламмыт.
Оскуола оҕолоругар “Хамаҕатта – мин дойдум” квест оонньуу буолбут. 5 хамаандаттан “Хамаҕатта” уолаттар хамаандалара кыайыылаах тахсыбыт.
