Кыһыл Дэриэбинэ. Ахсынньы 17 күнүгэр күнүс 11 чаастан «Сайдыы» култуура дьиэтигэр баһылык отчуотун истэ 16 киһи сырытта. 2025 сыллаахха нэһилиэккэ ыытыллыбыт үлэни баүылык Иван Ноговицын кэпсээтэ, салҕыы депуттаттар сэбиэттэрин бэрэдсэдээтэлэ Евгений Жирков представительнай орган үлэтин отчуотун сырдатта. Отчуоту кытта тэҥҥэ экраҥҥа слайданан ыытыллыбыт үлэлэр көһүннулэр. Боппуруостааһыҥҥа киирии иннинэ ааспыт сылга киирбит ыйытыктарга, этиилэргэ хоруйдары иһиттилэр.
Кыһыл Дэриэбинэ олохтооҕо Лариса Багынанова: өттөөһүн көҥүллэниитин, Тумачча уонна Граф ходуһаһа киирэргэ муоста наадатын, Балыйаҕа киирэр суола наһаа кумах буолан, таас кутааһынын, ходуһаҕа харыбыл наадатын, клуб иннигэр отсыпка о.д.а. боппуруостары биэрдэ.
Светлана Евстафьева: Гоголева 3 тоҕо кумах кутулларын, бөх кутар дьааһыктар алдьаныыларын, Э.Сивцева уулусссаҕа уот умайбатын, М. Решетникова 9 хаарбах дьиэттэн көһүүпрограммаҕа киириитин туһунан ыйытта.
Айталина Винокурова: 2026 сылга Кыһыл Дэриэбинэ кладбищата күрүөлэниэн наадатын, кулууп олбуора оҥоһуллуутун, дэриэбинэҕэ интернет наадатын туһунан тоһоҕолоон эттэ. Түмүккэ олохтоохтор дьаһалта ыыппыт үлэтин биһирээтилэр.
Эбиэт кэннэ 14 чаастан Граф Биэрэгин «Самородок» култуура дьиэтигэр 36 киһи кэлэнотчуоту иһиттэ.
Леонид Соловьев: Центральная уулуссаҕа баар оҕо былассаакатын күрүөтүн кырааскалаан бүтэрии, Графа Игнатьева уулуссаҕа хас да сыллааҕыта ылыллыбыт оҕо былассааккатын хомуйуу, ситэрии уонна анал байыаннай дьайыыга олохторун толук уурбут уолаттары кэриэстээн былассааккаҕа аат иҥэриитин толкуйдааһыҥҥа, оҕо былассааккатын Затон ситэтэ суох орто оскуолаҕа шефтээх биэрэргэ, дэриэбинэҕэ сайын сылгылар оҕолорго, улахан дьоҥҥо кутталы үөскэтэллэрин, уулусса сырдатыытыгар этиилэри киллэрдэ.
Анна Охлопкова: «Самородок» кулуубун биир дойдулаахпыт государственнай уонна политическай деятель И.Е.Винокуров үбүлүөйдээх сылынан Правительство мунньаҕар былааҥҥа капитальнай ремоҥҥа киллэриитин, кулууп наһаа тымныытын туһунан этилиннэ.
Афанасий Христофоров: Ыһыахтыыр сиргэ уонна Граф Биэрэгэр хатыҥнар өлөн эрэллэрин, паутиннай клещ буолуон сөп үөрэтэн, сөптөөх дьаһал ылыныахха наадатын эттэ. Графа Игнатьева элбэх квартираллах уопсай дьиэҕэ, сааскы халаан уутун кэннэ сваята уонна истиэнэтэ алдьанан эрэринэн ремонт наадатын туоһулаата.
Граф Биэрэгин олохтоохторо 2024 сыллаахха халаан уутун содулун туоратыыга улахан үлэ барбытын, дэриэбинэ дьиэлэрэ ремоннаммыттарын, нэһилиэккэ элбэх үлэ бара турарын көре-истэ, билэ сылдьалларын бэлиэтээн этэн туран, бары биир киһи курдук биһирээтилэр.
Киэһэ 17 чаастан Аппааны сэлиэнньэтин «Чороон» норуот айымньытын киинигэр дьаһалта отчуотугар 48 киһи сырытта. Баһылык Иван Ноговицын 2025 сыллаахха ыытыллыбыт үлэни сиһилии кэпсээтэ, социальнай, общественность, култуура, спорт, тыа хаһаайыстыбатыгар үлэ барарын бэлиэтээтэ. Демография көрдөрөрүнэн Нам улууһугар киһи өлүүтэ үрдээбитин, төрөөһүн аччаабытын бэлиэтээтэ.
Салҕыы нэһилиэк депутаттарын сэбиэтин бэрэдсэдээтэлэ Евгений Жирков кылгас иһитиннэрии оҥордо. Отчуот кэннэ боппуруостааһыҥҥа уонна этиилэргэ киирии буолла.
Василий Бурнашев: Сайын арыыга тахсан оттооччулар СПЖ суох буолан эрэйи көрөллөрүн, СПЖ га туох үлэ бара турарын туоһуласта. Арыыга оту өттөөһүн көҥүллэниитин ыйыталаста. Дьон сылдьарынан сибээстээн «Оҕустаах» аартыга оҥоһуллуутун туһунан этии киллэрдэ.
Михаил Сивцев: «Сайын арыыга киирэн оттуубут. Дамбаны үрдэтэннэр кыһын арыыттан оту тиэйэргэ көчүмэҕэйдэри көрсөбүт. Дамбаҕа саатар биир сиргэ намтаталлара буоллар».
Ангелина Алексеева: Новая уулусса суола оҥоһуллуутун уонна сырдатар үлэ барыан наадатын эттэ.
Светлана Парникова: Левина 1 уулуссанан улахан самосвал массыыналар саас сылдьан суолу алдьаталларын туһунан иһитиннэрдэ.
Олег Машников: Кырдал уулусса суола оҥоһуллуутун, Граф Биэрэгэр Гагарина 2 кв.4 баар уопсай квартира переселение программаҕа киириитин туоһуласта.
Саргылана Пономарева: 2026 сыл И.Е.Винокуров 130 сыллаах үбүлүөйүнэн Кыһыл Дэриэбинэҕэ баар ыһыахтыыр паарка уота саҥардыллан тардыллыан наадатын, бүгүн отчуотка кэлбит нэһилиэк олохтоохторо салҕыы улуус, правительство отчуотугар кэлэн эмиэ көхтөөхтүк кытталларыгар ыҥырда.
Анна Васильева: Тыа хаһаайыстыбатын боппуруоһа нэһилиэккэ тыын боппуруос буолар, онон статистикаҕа олоҕуран мониторинг оҥоһуллуутун, аҕа саастаах дьон сүөһү иитэллэригэр кооперативка наадыйалларын, оттооһуҥҥа мобильнай этэрээттэри тэрийии, Николай Гаврильев 105 сааһынан Хатыҥ-Арыы нэһилиэк киниигэтэ 2-с чааһа тахсыытын, Захар Винокуров уулусса күһүҥҥэттэн остуолбаларын уота үлэлээбэтин туһунан эттэ.
Анисия Эверстова: Элбэх квартиралаах уопсай дьиэлэргэ олорооччуларга тупсаран оҥорууга туох үлэ баарын, Аппааны сэлиэнньэтин стадиона, Мавра күөл ремоҥҥа наадыйарын, саҥа спортзал наадатын эттэ.
Павел Оконешников: Сыл аайы оскуолаҕа учууталларга вакансия тахсар. Билиҥҥи туругунан 6 атын улуустан кэлэн үлэлии сылдьаллар, олорор дьиэ суоҕа ыарахаттары үөскэтэр. Учууталларга анаан дьиэ тутуутугар үлэ барара буоллар диэн этии киллэрдэ.
Бары мунньахха тыл эппит, этии киллэрбит олохтоохтор дьаһалта 2025 сыллаах үлэтин биһирээтилэр. 2026 сылга ситиһиилэри, күүстээх үлэни баҕардылар.
Надежда Сивцева