Ахсынньы 30 күнүттэн тохсунньу 8 күнүгэр диэри Хатыҥ Арыы нэһилиэгэр саҥа дьыллааҕы дьуһуурустубалар олохтоох дьаһалта иһинэн ыытылла тураллар. Манна нэһилиэк иһинэн эппиэтинэстээх тэрилтэ салайааччылара ананан тэрилтэлэргэ дьуһуурустуба олохтонно.
Бырааһынньык кэмигэр рейдэлэр ыытыллаллар, тохсунньу үс күнүгэр олохтоох дьаһалта, оскуола, полиция үлэһиттэрэ буолан, тоҕус учуокка турар уонна ыарахан туруктаах дьиэ кэргэттэргэ рейдэ оҥоһулунна. ДНД чилиэттэрэ Сана дьыллааҕы тэрээһиннэргэ дьуһуурустубаҕа турдулар.
Тохсунньу 3 күнүгэр Кыһыл Дэриэбинэ «Сайдыы», тохсунньу 4 күнүгэр Граф Биэрэгинээҕи «Самородок» култуура кииннэригэр, тохсунньу 5 күнүгэр Аппааны бөһүөлэгин «Чороон» норуот айымньытын киинигэр оҕолорго аналлаах Саҥа дьыллааҕы тэрээһиннэр ыытылыннылар.
Тохсунньу 6 күнүгэр Граф Биэрэгинээҕи култуура киинигэр Ороһуоспатааҕы кэнсиэр, бал маскарад буолуоҕа уонна лотерея оонньонуоҕа.
Тохсунньу 7 күнүгэр Аппааны бөһүөлэгин «Чороон» норуот айымньытын киинигэр Ороһуоспатааҕы «Два голоса» дуэтынан кэнсиэрэ буолуоҕа.
Тохсунньу 12 күнүгэр бастыҥ үөрэхтээх, сыл устата үрдүк ситиһиилээх оскуола оҕолоругар Саҥа дьыллааҕы «Бал Главы» ыытыллыаҕа. Онтон 2023 сыл бастыҥнарын таһаарыы тохсунньу 20 күнүгэр буолара күүтүллэр.
Надежда Сивцева