Хатыҥ Арыы нэһилиэгин түөлбэлэрин икки ардыларыгар аан маҥнайгытын «Булчут күрэҕэ» ыытылынна.
От ыйын 3 күнүгэр Аппааны бөһүөлэгэр «Сиэдэрэй» күөлгэ нэһилиэк дьаһалтатын көҕүлээһининэн, түөлбэлэргэ анаан «Булчут күрэҕэ» ыытылынна. Маннык күрэҕи ыытыы туһунан аан маҥнай Сергей Андреевич Ильин этии киллэрэн, олохтоох дьаһалта, олохтоохтор уонна үгүс спонсор өйөбүлүнэн үрдүк таһымнаахтык барда.
Кыттааччылары Нам оруйонун баһылыга Юрий Слепцов, нэһилиэк баһылыга Иван Ноговицын, күрэх спонсордара Андрей Виссарионович Бочкарев, Евгений Викторович Эверстов, Оксана Ивановна, Александр Семенович Лебедевтар тыл эттилэр. Күрэх Улуу Кыайыы 80 сылыгар ананан, аҕа уолунаан кытынна. Манна 13 саастарыттан 15 саастаах уолаттар аҕаларын кытары булт абылаҥын, сатабылын барытын туораан көрдөрдүлэр.
Күрэххэ уопсайа 7 түөлбэттэн түөрт түөлбэ кыттыыны ылла. Аппааны бөһүөлэгиттэн «Саһарҕа» түөлбэттэн Сергей Ильин уолунаан Андрейдыын, « Виктория» түөлбэттэн Николай Дьяконов уолунаан Вадимныын, Граф Биэрэгин «Восход» түөлбэтиттэн Мичил Герасимов уолунаан Степалыын, Кыһыл Дэриэбинэ «Сандаара» түөлбэттэн Илья Петров уолунаан Леонидтыын кытыннылар. Күрэхтэһиини нэһилиэк спорт уонна ыччат отделын дириэктэрэ Егор Бурнашев судействолаах ыытылынна.
Күрэхтэһии икки түһүмэҕинэн ыытылынна. Эбиэккэ диэри маҥнайгы түһүмэххэ күрэхтэһээччилэр эрэһиинэ оҥочонон күөлү эрдэн тиийэн 3 мончуук бырахтылар уонна 5 шаригы 15 миэтэрэ ыраахтан уол воздушка саанан ытта. Бу күрэххэ бастыҥ көрдөрүүлээх 5 мүн. 16 сөк. Петровтар дьиэ кэргэн буоллулар. Күнүс эбиэккэ, кутааҕа, баһылык Иван Ноговицын сырылаччы буһарбыт ис миинин, түөлбэлэр астаан аҕалбыт сүөгэйдээх алаадьыларын бары күрэх кыттыылаахтара, тэрийээччилэр уонна көрөөччүлэр остуол тула олорон аһаан, күүс-уох ылыннылар. Күн чаҕылыйа тыган, сылаас тыалынан илгийэн күрэхтэһээччилэргэ биир умнуллубат күнү бэлэхтээтэ.
Эбиэт кэннэ иккис түһүмэххэ түөрт хамаанда уолаттара 5 лиитэрэ бытыылкаҕа күөлтэн баһан аҕалбыт ууларын биэдэрэҕэ кутан, аҕалара оллоон оҥорон, мас хайытан кутаа оттон ууларын оргуттулар. Манна аҕалар уолаттарын кытта чугас сыһыаннара, түргэннэрэ, сымса өйдөрө, сатабыллара көһүннэ. Аан маҥнай Герасимовтар уулара оргуйан кыайыы өрөгөйүн биллилэр.
Түмүккэ, уолаттарга анаан күрэх ыытылынна. Манна уолаттар эрэһиинэ оҥочоҕо олорон 200 м. уһуннаах дистанцияны уһуннулар. Манна Леонид Петров бастакы, иккис Степан Герасимов, үһүс Андрей Ильин буолан мэтээлинэн, туоһу суругунан наҕараадаланнылар.
Түмүккэ 1 миэстэни Кыһыл Дэриэбинэттэн Илья Иванович Петров уолунаан Леонидтыын кыайан Нам улууһун баһылыгын Юрий Слепцов 10 тыһ. солк. сертификатын туттулар, иккис миэстэни Граф Биэрэгиттэн Мичил Герасимов уола Степалыын ыллылар уонна спонсор Андрей Бочкаревтан 8 тыһ. солк. сертификатынан наҕараадаланнылар, үһүс миэстэни Сергей Ильин уола Андрейдыын ылан нэһилиэк баһылыга Иван Ноговицын 5 тыһ. солк. сертификатын тутта. Николай Дьяконов уола Вадимныын Лебедевтар дьиэ кэргэн 3 тыһ.солк. сууммалаах сертификатынан наҕараадаланнылар. Дьяконовтар дьиэ кэргэн саамай кыра уол кыттааччы уонна саамай саастаах аҕа кыттааччы буолан, Евгений Эверстов анал бирииһин туттулар. Евгений Викторович Эверстов маны тэҥэ хас биирдии күрэх кыттыылааҕар «Нам –авто» маҕаьыыҥҥа сертификатын үөрүүлээх быһыыга туттарда. Түөлбэ салайааччылара түөлбэ чиэһин көмүскээбит дьонугар сэмэй бэлэхтэрин туттардылар.
Улууска аан маҥнай маннык тэрээһин үрдүк таһымҥа ыытыллыбытын туһунан тэрийээччилэр уонна көрөөччүлэр эттилэр. Түөлбэ дьонун түмэр, саха сирин кэрэ айылҕатын кытары алтыһар биир ситимниир күрэх буолбутун бэлиэтээн туран, тэрийээччилэргэ, бары спонсордарга, түөлбэ салайааччыларыгар, кыттааччыларга махтал тылларын тиэрдэбит.
Кэлэр сылга маннык күрэх үтүө үгэс буолан өссө элбэх кыттааччылаах ыытыллыа диэн эрэнэбит.
Надежда Сивцева