Балаҕан ыйын 5 күнүттэн 15 күнүгэр диэри «Эҥсиэли» редакцията саамай улахан уонна саамай ураты быһыылаах-таһаалаах хортуоппуйга куонкурус биллэрбитэ.
Бу 10 күн устата улууспут бары нэһилиэктэриттэн көхтөөхтүк кытыннылар. Араас ураты быһыылаах хортуоппуйдарын хаартыскаларын ыытан сөхтөрдүлэр, күллэрдилэр, сэргэхситтилэр.
Куонкуруска барыта 23 киһи кыттыыны ылла. Сылаас, ылааҥы күһүҥҥү күннэри баттаһа хортуоппуйдарын хостуулларыгар, биһиги куонкуруспут көх-нэм буолан көмөлөспүтүгэр саарбахтаабаппыт. Дьиэ кэргэттэр күһүҥҥү хомуур үлэтин сынньалаҥы кытта дьүөрэлээн үөрэ-көтө кытыннылар. Ону киирбит үлэлэр көрдөрөллөр.
Куонкурус түмүгүнэн ураты быһыылаах-таһаалаах “Кутуйах” хортуоппуйун иһин 418 куолаһы ылбыт Аппааныттан Олесова Елизавета Дмитриевна кыайыылааҕынан таҕыста.
Киниэхэ куонкуруспут генеральнай спонсора быйыл тэриллибитэ 30 сылын бэлиэтиир доруобуйа харысхалын эйгэтигэр үлэлиир саамай бөдөҥ “Сахамедстрах” АО тэрилтэ Намнааҕы салаата, мед.хампаанньа үлэһитэ Наталья Гоголева, бирииһэ хозмаркеттан 1000 солк. сертификата туттарыллар.
Саамай улахан хортуоппуйга 108 куолаһы ылан Салбаҥтан Ощепкова Айна кыайыылаах буолла.
Киниэхэ генеральнай спонсордарбытыттан биирдэстэрэ «Триенс» кредит хампаанньа, сал. Евдокия Рожина, сад инструменнарын набора уонна сибэкки кашпота ананар.
Редакция поощрительнай бириис быһыытынан, “Пятачок” хортуоппуйун иһин, Нам сэлиэнньэтиттэн Афанасьева Оляҕа уонна Аппааныттан “Картофельные утята” хортуоппуйун иһин Васильев Моисей Павловичка хозмаркеттан 500 солк. сертификаттар бэриллэллэр.
Кыайыылаахтар бириискитин “Эҥсиэли редакциятыттан, Нам сэл Ст. Платонов аатынан уулусса ½ Нотариус дьиэтин 2 этээһиттэн, сарсын балаҕан ыйын 16 күнүгэр 10 чаастан 17 чааска диэри кэлэн ылаҕыт.
Дьэ, бу курдук куонкуруспут түмүктэннэ. Барыгытыгар көхтөөхтүк кыттыбыккытыгар махталбытын тиэрдэбит. Инникитин да бу курдук көхтөөх буолуҥ, өлгөм үүнүүгүтүнэн эҕэрдэлиибит.
«Эҥсиэли» редакцията