Бүгүн Нам улууһун киинигэр П.П. Ядрихинскай-Бэдьээлэ аатынан Олоҥхо дьиэтигэр Нам улууһуттан СВО-ҕа кыттар байыастар дьиэ кэргэттэрин кытта кэпсэтии буолла. Тэрээһин байыастарбытыгар этэҥҥэ буолууну баҕарар үтүө санааны тиэрдэр сахалыы алгыһынан саҕаланна.
Кэпсэтиини Нам улууһун депутаттарын сэбиэтин председателэ Алексей Винокуров сүрүннээтэ. Тэрээһиҥҥэ кыттыыны ыллылар: “Буойун” общественнай түмсүү салайааччыта Павел Оконешников, Нам улууһун байыаннай комиссара Владислав Васильев, Намнааҕы социальнай харалта управлениетын салайааччыта Феврония Охлопкова, Нам улуустааҕы киин балыыһатын кылаабынай бырааһа Ариан Сергеев, улуус дьаһалтатын ыччат уонна дьиэ кэргэн отделын специалистара, «Ленскэй нэһилиэк» МТ баһылыгын социальнай боппуруостарга солбуйааччы Тимофей Охлопков, «Көбөкөн нэһилиэгэ» МТ баһылыга Гаврил Гоголев, «Биир ньыгыл Россия» баартыйа Намнааҕы олохтоох отделениетын толорооччу секретара Сардана Еремеева уо.д.а.
Павел Оконешников анал байыаннай дьайыыга кытта сылдьар биир дойдулаахтарбытын көрсүбүт сырыыларын сырдатта. Нам улууһун делегацията командировкаҕа айаннарын, көрсүһүүлэрин видеоҕа устубуттарын, хаартыскаҕа түһэрбиттэрин экраҥҥа көрдөрөн кэпсээтэ. Улууспут олохтоохторо биир санааланан, сомоҕолоһон, аахсыйаларга кыттыһан байыастарбытыгар улахан көмөнү, үтүө дьыаланы оҥороллорун бэлиэтээтэ. Ичигэс таҥаһы-сабы, туттар тэриллэри, баһыылкалары, оҕолор суруктарын, харысхаллары, саха быһахтарын, дойдубут аһын-үөлүн тиэрдэн тиксэрбиттэрин, онтон уолаттарбыт санаалара күүһүрэрин, бөҕөргүүрүн эттэ.
Ити кэнниттэн аһаҕас кэпсэтии саҕаланна. Мустубуттар элбэх мунаарар ыйытыыларын биэрдилэр. Ол курдук, анал байыаннай дьайыыга кыттар сорох байыастарга ыйдааҕы төлөбүрдэрэ тоҕо тардылларын, коммунальнай төлөбүргэ, уоту төлөөһүҥҥэ чэпчэтии тоҕо олохтоммотун, СВО-ҕа кыттар уолаттар 6 ый буолан баран, тоҕо уоппускаҕа кэлбэттэрин, сорох байыастар баһыылкаларын билигин да тоҕо ыла иликтэрин, контрактниктар болдьохторо бүттэҕинэ тоҕо тохтооботторун, хомуурга хабыллан сылдьааччылары тоҕо солбуйбаттарын о.д.а. араас ыйытыылары биэрэн хоруйдары ыллылар, элбэх сүбэни-аманы иһиттилэр.
Намнааҕы социальнай харалта управлениетын салайааччыта Феврония Охлопкова федеральнай сокуоҥҥа олоҕуран СВО-ҕа кыттар байыастарга, кинилэр дьиэ кэргэттэригэр көрүллэр социальнай өйөбүл, көмө туһунан сиһилии иһитиннэрии оҥордо.
Нам улууһун депутаттарын сэбиэтин председателэ Алексей Винокуров бу курдук СВО-ҕа аналлаах араас тэрээһиннэри ыытыыга көмөтүн иһин СӨ «ЯКУТИЯ С ТОБОЙ» анал байыаннай дьайыы кыттыылаахтарын өйүүр общественнай хамсааһын аатыттан махтал суругу П.П. Ядрихинскай-Бэдьээлэ аатынан Олоҥхо дьиэтин салайааччытыгар Вера Колпашниковаҕа туттарда.
Тэрээһин кыттыылаахтара дуоһунастаах, эппиэттээх үлэһиттэри кытта атах тэпсэн олорон, аһаҕастык кэпсэппиттэриттэн астыммыттарын биллэрдилэр, СВО байыастарыгар, кинилэр дьиэ кэргэттэригэр болҕомто ууралларын иһин тэрийээччилэргэ махтаннылар.
Түмүгэр инникитин да маннык тэрээһиннэр ыытылла туруохтара этилиннэ. Кылаабынайа, уолаттарбыт этэҥҥэ сылдьан, Кыайыыны аҕалалларыгар эрэнэллэрин биллэрдилэр.
Касьян Олесов-Олук