Саха сиригэр ыам ыйын 5 күнүттэн РСЧС Саха сиринээҕи территориальнай подсистематын салайар уорганнарыгар уонна күүстэригэр үрдүк бэлэмнээх буолуу режимин биллэрбиттэрэ. Маннык быһаарыыны өрөспүүбүлүкэ Ил Дархана Айсен Николаев салалтатынан ыытыллыбыт ыксаллаах быһыыны-майгыны сэрэтиигэ уонна суох оҥорууга, ойуур баһаарыттан куттала суох буолуутун хааччыйыыга хамыыһыйа мунньаҕар ылыммыттара.
Ыам ыйын 6 күнүгэр улуус дьаһалтата, тустаах управлениелар, тэрилтэлэр Хатырык нэһилиэгэр халаан уутуттан бэлэмнэнии үлэтин билистилэр уонна халаан уутуттан эмсэҕэлээбэт уонна бэлэмнээх буолуу туһугар үөрэх тэрийдилэр. Санатан эттэххэ, маннык тэрээһин муус устар 23 күнүгэр Үөдэй нэһилиэгэр ыытыллыбыта.
Хаартыска: «Нам улууһа» МО пресс-сулууспата
Ыксаллаах быһыыга-майгыга бэлэмнээх буолуу мунньаҕын «Нам улууһа» МО баһылыгын бастакы солбуйааччы Анатолий Павлов ыытта. Мунньахха улуус баһылыгын тыа хаһаайыстыбатыгар солбуйааччы Филипп Николаев, гражданскай оборонаҕа уонна ыксаллаах быһыыны-майгыны туоратыыга сүрүн специалист Николай Монастырев, улуустааҕы тыа хаһаайыстыбатын управлениетын начальнига Владимир Макаров, солбуйааччыта Юрий Петров, кэккэ нэһилиэктэр баһылыктара, тыа хаһаайыстыбатын специалистара, Хатырык нэһилиэгин тэрилтэ салайааччылара, эппиэтинэстээх дьон кыттыннылар.
Хатырыкка уопсайа 1023 киһи пропискалааҕыттан 550 киһи бастайааннай олорор, ол иһигэр 199 — оҕо. Детсадка — 44 иитиллээччи баар, оскуолаҕа 138 оҕо үөрэнэр. Сүөһү ахсаана — 848 төбө, сылгы уопсайа — 504 төбө.
Хаартыска: «Нам улууһа» МО пресс-сулууспата
Нам улууһун сиригэр-уотугар көмүөл ыам ыйын 15-16 күннэригэр устара сабаҕаланарын эттилэр. Мунньах кэнниттэн тэрилтэ салайааччылара, түөлбэ председателлэрэ, эппиэтинэстээх үлэһиттэр халаан уутуттан сэрэхтээх буолууга ыытар үлэлэрин туһунан кэпсээтилэр. Ыксаллаах быһыы-майгы буолан эвакуация биллэриллэр түгэнигэр хайаан даҕаны 100% көһүөхтээхтэрин эттилэр. Сүөһү-сылгы быстах кэмҥэ хаайыллар сирэ, дьон-сэргэ быстах кэмҥэ олорор пууна быһаарыллан, бэлэмнэр. Баайы-дуолу, дьиэни-уоту, техниканы страховкалаталларыгар санаттылар. Итиэннэ ойуур баһаарыттан сэрэхтээх буолууга сэрэтэр, өйдөтөр үлэни күүскэ ыыталларыгар, өртөөһүн, баһаары оҥоруу сокуонунан накаастабыла, ыстарааба үрдүгүн эттилэр.
Бэйэ информ.