Дойдубут үрдүнэн сэтинньи 8 күнүгэр сулууспаларын толоро сылдьан олохторун толук уурбут РФ ис дьыала сотрудниктарын кэриэстиир күн. Ол чэрчитинэн бүгүн Нам улуустааҕы ис дьыала сотрудниктара, бэтэрээннэрэ, Нам техникумун 1 курсун студеннара кэриэстэбил митиҥҥэ кытыннылар.
Общественнай бэрээдэги кэһиини таһаарбат туһугар, суолга куттала суох айаны хааччыйыыга сулууспаларын толоро сылдьан олохторун толук уурбут полиция майорун Петр Петрович Васильевы, милиция капитанын Леонид Семенович Иванову, милиция рядовойун Альберт Афанасьевич Москвитины кэриэстээтилэр.
Бочуоттаах караул турбут өйдөбүнньүк скверигэр ол туһунан ахтан, өйдөөн-санаан тыл эттилэр: Михаил Михайлович Кокарев, Нам улуустааҕы ИДьО начальнига, полиция подполковнига, Валерий Михайлович Шелковников, отставкаҕа сылдьар полиция прапорщига, Надежда Егоровна Васильева, П.П. Васильев огдообото.
Үлэлэригэр бэриниилээх сотрудниктары кэриэстээн бары сөҥүөрэн, чуумпуран турдулар. Анаммыт сотрудниктар салгыҥҥа ытан өйдөбүлү бэлиэтээтилэр. Сквергэ полиция мл. лейтенаннара Иван Тихонов, Станислав Брызгалов, Дмитрий Захаров, Илья Сивцев веногу, онтон митинг кыттыылаахтара сибэкки дьөрбөтүн уурдулар.
Намнааҕы ИДьО сотрудниктара, бэтэрээннэрэ эр санаалаах биир идэлээхтэрин кэриэстээтилэр, сырдык ааттарыгар сүгүрүйдүлэр уонна умнубаттарын, өйдүүллэрин биллэрдилэр.
Касьян Олесов-Олук.