Нам улууһуттан Ил Түмэн депутаттара Александр Атласов, Алексей Еремеев оробуочай сырыыларын чэрчитинэн олунньу 4 күнүгэр Хамаҕаттаҕа сырыттылар. “Түһүлгэ” норуот айымньытын киинигэр олохтоохтору кытта көрүстүлэр, ааспыт сыллааҕы үлэ түмүктэрин билиһиннэрдилэр.
Киэһэ 4.30 чаастан саҕалаан үс чаас устата элбэх боппуруоһу таарыйан аһаҕас кэпсэтиини тэрийдилэр.
Ол курдук, мунньах кыттыылаахтара тыа хаһаайыстыбатыттан саҕалаан, ыт, свалка, сайыҥҥы уу ситимин үлэлэтиигэ баар ыарахаттары, электрик суоҕун, үбүлээһин тиийбэтин ыйдылар. Анал байыаннай дьайыы, “вертикаль власти”, Конституция, олохтоох бэйэни салайыныы бэбиэскэттэн түспэтилэр. Оскуолаларга оптимизация, лицейгэ капремонт, улууска сылы эргиччи үлэлиир капитальнай лааҕыр, үлэ бэтэрээнэ боппуруостарын көтөхтүлэр. Трасса кытыытынан сатыы дьон сылдьарыгар тротуар, ГАИга диэри уоту тардыы, халаантан харыстыыр даамба тутуута, биэрэги бөҕөргөтүү үлэлэрэ салгыы баралларыгар баҕаларын чиҥэтэн биллэрдилэр. Биир сүрүн туруорсуунан саҥа духуобунай сайдыы киинин тутуута буоларын тоһоҕолоон эттилэр. Улууска “Культурный код Намского улуса” программа олоххо киириитигэр, Нам улууһа 400 сыллаах историяны саҕалаабыт “Аан улуус” буоларын билинэргэ көмө-тирэх буоларга көрдөстүлэр. Кэпсэтиигэ нэһилиэнньэ көхтөөхтүк кытынна, киирбит этиилэр, туруорсуулар болҕомтоҕо ылыллан, туһааннаах сирдэргэ тиийэн, быһаарыллан иһэллэригэр эрэллэрин биллэрдилэр уонна өрүү сибээстээхтик үлэлииллэригэр махтаннылар.
Нам депутаттара дойдуларыгар сырыылара, нэһилиэнньэни кытта көрсүһүүлэрэ хардарыта туһалаах буоллун!
Мария Винокурова