Бүгүн СӨ Судаарыстыбаннаһын күнүгэр Хатыҥ Арыы нэһилиэгэр И.Е. Винокуров төрөөбүтэ 130 сылыгар аналлаах Винокуровскай сүүрүү үһүс этаба буолла.
Манна Хамаҕаттаттан баран кыттыыны ылбыттарын туһунан хаалыктаах хаамааччылар түмсүүлэрин салайааччыта Лена Канаева бу курдук кэпсиир:
— Хамаҕаттаттан хаалыктаах хаамыыны сэҥээрээччилэр барыта 8 киһи буолан кытынныбыт, 2,5 км тэтимнээхтик хаамтыбыт. Улуус үрдүнэн 83 киһи хаампытыттан биһиги кыыспыт, улууска биллэр спортсменка Саргылаана Назарова кыайыылаах үрдүк аатын ылан пъедестал чыпчаалыгар турда, харчынан бириэмийэ тутта. Бу иннинэ буолбут хаамыыларга кини эмиэ бастакы миэстэни ылбыта, мин 1 Хомустаахха ыытыллыбыт хаамыыга үһүс миэстэ буолбутум.
Саргылаана Назарова 1 м.
Уратыта диэн маннык хаамыыга эр дьон, дьахтар диэн араарбакка бары бииргэ бараллар. Маны таһынан улахан уолаттарга Хамаҕаттаттан куруук кыттар уолбут, 10 кылаас үөрэнээччитэ Даниил Охлопков ааспыкка уонна бүгүн 5 км сүүрүүгэ 3 бириистээх миэстэни ылан, кыахтааҕын көрдөрдө.
Даниил Охлопкова 3 м.
Бүгүҥҥү тэрээһини И.Е. Винокуров биир дойдулаахтара олус үчүгэйдик, үрдүк таһымнаахтык ыыттылар. Ол курдук, кыттааччы нүөмэринэн лотерея оонньоттулар, музыкальнай эҕэрдэлэри бэлэмнээбиттэр, атыы-эргиэн дьаарбаҥкатын тэрийдилэр уонна кэлбит дьону минньигэс итии аһылыгынан күндүлээтилэр. Онно эбии күһүҥҥү сылаас күн туран биэрэн мустубут дьон-сэргэ үөрэ-көтө сырытта.
Ыалдьааччылар ортолоругар эмиэ сонун күрэх тэрилиннэ. Ол курдук, ордук күүскэ “ыалдьыбыт”, ыһыытаан-хаһыытаан күрэхтэһии хаамыытын күүркэтэн биэрэр ыалдьааччылар бастыҥ фан-клуб бириискэ тигистилэр.
Тэрийээччилэр толкуйдарынан, үс күрэххэ кыттыбыт спортсмен мэтээллэрин холбуу туттахха, Эҥсиэли хочотун бэлиэтэ куба ойуута тахсар. Бу эмиэ киһини үөрдэр, киэн туттуу санаатын үөскэтэр. Маннык элбэх киһи кыттыылаах үтүө тэрээһиҥҥэ Хамаҕатталар элбэх буолан күргүөмүнэн баран кыттарбыт буоллар диэн баҕа санаалаах кэллибит.
Мария Винокурова