Бүгүн Нам улууһугар “Комсомольская правда” хаһыат корреспондена, журналист, айанньыт Григорий Кубатьян ыалдьыттыыр.
Кини чөл олоҕу тутуһар нэһилиэктэри үөрэтэ кэлбит. Григорий Кубатьяны “Трезвая Якутия” ХЭТ бэрэссэдээтэлэ Лыткин Матвей Иванович арыаллыыр.
Журналист Нам улууһугар чөл олоҕу тутуһуу бүтүн Россия демографиятыгар уонна дьон олоҕор үчүгэйдик дьайарын бэлиэтээтэ. Кини бу Саха сиригэр тарҕаммыт чөл олох пропагандатын атын регионнарга киллэрэн туһаныахха сөбүн үөрэтэр сыаллаах-соруктаах кэлбит.
Көрсүһүүгэ Нам улууһугар чөл олоҕу тарҕатааччы Любовь Маркова, дьиэ кэргэн уонна ыччат отделын салайааччыта Екатерина Евстафьева, улуус мунньаҕын депутата Александр Кириллин, ыччат уонна дьиэ кэргэн социальнай-психологическай киинин филиалын салайааччыта Анна Васильева, “Агросектор” дьахтар общественнай түмсүүтүн бэрэссэдээтэлэ Екатерина Стручкова, Намнааҕы спорт оскуола завуһа Николай Абрамов, Ленскэй нэһилиэк дьаһалтатын специалиһа Анна Слепцова бааллар. Кинилэр чөл олоҕу тарҕатыыга, тутуһууга санааларын эттилэр.
Холобура, Александр Кириллин бэлиэтииринэн, Нам улууһугар чөл олоҕу тутуһуу саамай үтүө түмүгэ – буруйу оҥоруу аччаабыта уонна ыччат спорка ситиһиитэ элбээбитэ буолар.
Григорий Кубатьян бөлөҕө салгыы Үөдэй, Хатырык нэһилиэктэригэр айаннаата.
Бэлиэтээн эттэххэ, бу күн Нам сэлиэнньэтигэр саамай сырыылаах суол быһа охсуһуутугар, Ленскэй нэһилиэк сир биэрэн, чөл олоҕу кэпсиир саҥа баннер турда.
Дарина Константинова
Видео Роман Шапошников
https://t.me/truekpru