Бүгүҥҥү күҥҥэ үлэ-хамнас үөһүгэр олорор Модут нэһилиэгэр сылдьан, «Кыайыы 80 сылыгар — 80 үтүө дьыала» хамсааһын чэрчитинэн ыытыллыбыт субуотунньукка оскуола учууталлара, үлэһиттэрэ Максим Мамаев, Владислав Винокуров, Валерий Евстафьев, Владислав Попов, Владимир Гуляев, Пётр Охлопков күргүөмнээхтик күүскэ үлэлии сылдьалларыгар түбэстим.
Кыайыы скверэ олус ис киирбэхтик чочуллубут. 45- тээх пушканы, Максим пулемету чахчы да кырыктаах сэрии сэптэрин үүт-үкчү гына, олохтоох тимир ууһа Василий Колесов оҥорон туруоран, силигин ситэрбит.
Сквер хаарын Пётр Охлопков тракторынан сыа-сым курдук тутан, кутуллуохтаах сиригэр чөкөтөн кэбиһэр.
Бу турдахпына, эбэҕэ икки кутан туруйа даллаһан кэлэн түстүлэр. Халлаан сылыйан, кэлиэххэ айылаахтар тымныы диэбэккэ, төрүү-ууһуу кэлэттээн эрдэхтэрэ…
Хомуйар, ыраастанар күн-дьыл кэлэн, ханан да үлэ үгэннээн, хамсааһын салҕанан эрдэҕэ.
Т. Терешкина