Кулун тутар 8 күнүнэн – Аан дойду дьахталларын күнүнэн ис сүрэхпиттэн эҕэрдэлиибин!
Дьахталлар бырааптарын туруулаһыы бэлиэтигэр олохтоммут бырааһынньык бүгүн киэҥ далааһыннанна, хаһааҥҥытааҕар да истиҥ, сылаас тыыннанна. Бу сааскы чаҕылхай күн биһиэхэ ураты суолталаах – таптал, махтал тылларын эбээлэрбитигэр, ийэлэрбитигэр, кэргэннэрбитигэр, кыргыттарбытыгар, эдьиийдэрбитигэр, балыстарбытыгар аныыбыт. Билиниибит, ытыктабылбыт, киэн туттуубут дьахтарга – алаһа дьиэни араҥаччылааччыга, туруу үлэһиккэ, үтүөҕэ уһуйааччыга, сыралаах үлэтинэн, ахсаабат кыһамньытынан хас биирдии дьиэ уйгутун тэрийээччигэ ис сүрэхтэн ананар. Эһиги мындыр өйгүт-санааҕыт, тапталгыт, аһыныгас майгыгыт, күүстээх санааҕыт эр дьону өрүүтүн да кыайыыга, үрдүккэ кынаттыыр.
Туруктаах олохпут, уйгубут эһигиттэн улахан тутулуктаах. Дьиэ кэргэни араҥаччылыыр аналгытын бары эйгэҕэ – үөрэххэ уонна доруобуйа харыстабылыгар, бырамыысыланнаска уонна тыа хаһаайыстыбатыгар, наукаҕа, култуураҕа, судаарыстыбаннай былаас уорганнарыгар үрдүк көрдөрүүлээх үлэҕитин кытта хоһулуу тутаҕыт. Эһиги туохха барытыгар ураты эппиэтинэстээх сыһыаҥҥыт, буулаҕа санааҕыт өрөспүүбүлүкэ бигэ сайдыытыгар элбэҕи быһаарар.
Уопсастыба сайдыытыгар дьахтар сүҥкэн кылааты киллэрэр. Саха сиригэр дьиэ кэргэни уонна оҕо сааһы өйүүр, урбааны сайыннарар, социальнай, култуурунай уонна сырдатар бырайыактары олоххо киллэрэргэ туһуланар дьахталлар сүүһүнэн сэбиэттэрин, кулууптарын уонна көҕүлүүр бөлөхтөрүн түмпүт Арассыыйа дьахталларын холбоһугун эрэгийиэннээҕи салаата уонна “Саха Өрөспүүбүлүкэтин дьахталларын тэрилтэлэрин холбоһуга” айымньылаахтык үлэлииллэр.
2025 сылга араас идэлээх уон аҕыс дьахтар Саха Өрөспүүбүлүкэтин Ил Дарханын “Үлэ киһитэ – 2025” бириэмийэтин лауреатынан ааттаммыта. Бу туруу үлэһит дьахталлар идэни үрдүк таһымнаахтык баһылааһын, эппиэтинэстээх, төрөөбүт сиргэ бэриниилээх буолуу холобурунан буолаллар.
Оҕолорун дьоһун киһи буоларга иитэр-такайар, элбэх омуктаах норуоппут үгэстэригэр уһуйар ийэлэрбитигэр истиҥник махтанабыт. Дьиэ кэргэни, ийэ буолууну уонна оҕону өйөөһүн – өрөспүүбүлүкэ судаарыстыбаннай бэлиитикэтин тумус тутар хайысхата.
Аҕам саастаах дьахталларга – үлэ бэтэрээннэригэр, учууталларга, доруобуйа харыстабылын уонна тыа хаһаайыстыбатын үлэһиттэригэр сүгүрүйэбин. Эһиги уопуккут, олоҕу көрүүгүт, төрөөбүт дойдугутугар бэриниигит эдэр ыччакка үтүө холобур буолар, утуму салгыыр.
Дойдубутугар уустук кэм кэлбитигэр Саха сирин дьахталлара тулуурдарын, гражданин быһыытынан үрдүк эппиэтинэстэрин көрдөрдүлэр. Эһиги волонтёрдар хамсааһыннарыгар көхтөөхтүк кыттаҕыт, гуманитарнай көмөнү тэрийэҕит, Аҕа дойдуну көмүскээччилэри өйүүгүт, буойуннарбыт дьиэ кэргэттэригэр көмө-тирэх буолаҕыт. Эйэлээх олоҕу туруулаһа сылдьар байыаннай сулууспалаахтарбыт ийэлэригэр, кэргэннэригэр, эдьиийдэригэр, балыстарыгар ураты махталбын тиэрдэбин. Эһиги эрэлгит, тапталгыт уонна тулуургут буойуннарбыт санааларын бөҕөргөтөр уонна инникигэ эрэли үөскэтэр.
Бу бэлиэ күн эһиэхэ доруобуйаны, этэҥҥэ буолууну, уҕараабат эрчими баҕарабын. Хас үүнэр күн эһиэхэ үөрүүнү, чугас дьоҥҥут өйөбүлүн уонна саҥа ситиһиилэри аҕаллын. Сүрэххитигэр мэлдьи сааскы күн сандаардын! Бырааһынньыгынан, Аан дойду дьахталларын күнүнэн!
Саха Өрөспүүбүлүкэтин Ил Дархана А.С. Николаев