Ааспыты анаарар, үтүөнү үйэтитэр Музей күнүнэн эҕэрдэлээн туран Е.М. Шапошников аатынан Хамаҕатта орто оскуолатын музейын үлэһитэ Яна Петрованы кытта кэпсэтиибититтэн:
— Яна Романовна, хаһааҥҥыттан музей-хоһо тэриммикитий?
2023 сыллаахтан тэриммиппит. Ирдэбил быһыытынан сүрүн көрдөрөр-билиһиннэрэр экспозицияларбытынан Хамаҕаттабыт нэһилиэгин историята, Аҕа дойду Улуу сэриитэ, анал байыаннай дьайыы тиэмэлээх стендэлэр буолаллар.
— Оскуола историятыгар аналлаах туох баарый?
Оскуолабыт мантан төрүттээх график-худуоһунньук Е.М. Шапошников аатын сүгэринэн киниэхэ аналлаах экспозиция, республикаҕа биллибит «Төлөннөөх сурэхтэр» пионерскай этэрээт историятын, оскуоланы мэтээлинэн бүтэрээччилэр туһунан кэпсиир стендэлэри оҥорбуппут, ону өрүү сэргииллэр.
— Музей-хос фондатын хаҥатарга хайдах үлэлэһэҕит?
Түмэл тэриллэрин саҕана «Түмэлгэ бэлэхтэ оҥор» диэн акция биллэрбиппит. Оскуоланы араас сылларга бүтэрбит выпускниктар тута көхтөөхтүк кыттан барбыттара. Билиҥҥээҥҥэ диэри салҕанар. Ол курдук, түмэлбит көрдөрөр матырыйаала хаҥыы охсубута. Ону таһынан ветеран учууталбыт Тамара Ивановна Бурнашева, пионербаһаатай Вера Алексеевна Чирикова мунньан хаалларбыт матырыйааллара сүрүн фондабыт буолар. Хас экскурсия оҥордохпут аайы махтана саныыбыт.
Биир үтүө үгэһинэн үбүлүөйдээх оскуоланы бүтэрээччилэр анал кинигэ, альбом таһааттаран бэлэхтииллэрэ буолла. Бастакы кинигэни 1969 сыллаахха бүтэрбит 10,,а» кылаастар бэлэхтээбиттэрэ. Маннык оскуола историята тиһиллибит кинигэлэр, альбомнар туспа коллекция буолан эрэллэриттэн үөрэбит. Оскуола музейын саамай өйөөччүлэринэн, көмөлөһөөччүлэринэн выпускниктар буолаллар. Түгэнинэн туһанан, кинилэргэ махталбытын аныыбыт.
— Музей үлэтигэр оҕолору сыһыараҕыт дуо?
Экскурсовод оҕолору бэлэмниибит. Ол курдук 8,,а» кылаастан Ачикасов Денис, Рожин Леомар, 6,,б»-тан Иванов Айхал экскурсия ыыталлар, музейнай уруоктарга көмөлөһөллөр.
Кыайыы 80 сылыгар «Оскуола буойун-үлэһиттэрэ» экспозиция саҥардылынна.
— Оскуолаларга музей баара хайдаҕый?
Улуус оскуолаларыгар кыра да буоллар музей-хостор тэрилиннилэр. Олох кыра штатка хос ноҕурууска быһыытынан үлэлиибит. Биһиги Маргарита Мухиналыын иккиэбит. Билигин патриотическай иитии боппуруоһа тыҥаабыт кэмигэр олус тоҕоостоох, көдьүүстээх. Биһиги үлэбитин улуус үөрэҕин салаатыттан Елена Шарапова сүрүннүүр, былааннаах үлэ барар.
Мария Винокурова