СӨ Государственноһын күнэ — норуот сомоҕолоһуутун кэрэһэлиир бэлиэ түгэн. Бүгүн киэн туттар биир дойдулаахпыт, биллиилээх государственнай-политическай деятель Максим Кирович Аммосов төрөөбүт түөлбэтигэр, Хатырык нэһилиэгэр, СӨ Государственноһын күнүгэр анаммыт тэрээһиҥҥэ нэһилиэк дьоно-сэргэтэ, оскуола үөрэнээччилэрэ, улуус общественноһа муһунна.
Тэрээһин саха норуотун саргытын салайсыбыт сүдү киһибитигэр Максим Кирович Аммосовка сүгүрүйүүттэн саҕаланна.
Чаҕылхай Махсыым пааматынньыгар сибэкки дьөрбөтүн уурдулар: СӨ Ил Түмэнин бэрэссэдээтэлэ Алексей Еремеев, Ил Түмэн депутата Александр Подголов, СӨ норуоттарын дьыалаларыгар, тас дойдулары кытта сыһыаннаһыыга министрэ Гаврил Кириллин, Нам улууһун баһылыга Юрий Слепцов, Хатырык нэһилиэгин баһылыга Артур Ноговицын, СӨ Ил Түмэнин депутаттара, тэрилтэлэр салайааччылара, улуус общественноһа.
Салгыы М.К. Аммосов аатынан СӨ Государственноһын историятын республикатааҕы түмэлигэр бэлиэ күҥҥэ анаммыт общественность мунньаҕа буолла. Эҕэрдэлэрин тиэртилэр: СӨ Ил Түмэнин бэрэссэдээтэлэ Алексей Еремеев, СӨ норуоттарын дьыалаларыгар, тас дойдулары кытта сыһыаннаһыыга министрэ Гаврил Кириллин, Нам улууһун баһылыга Юрий Слепцов.
Бу күн чэчирии сайдар Саха сирэ үлэҕэ, олоххо ситиһиилэринэн cаҥа саҕахтары арыйарын бэлиэтээтилэр. Оскуола үөрэнээччилэригэр, ыччакка историческай суолталаах күннэри — муус устар 27 күнүгэр бэлиэтэнэр СӨ, балаҕан ыйын 27 күнүгэр бэлиэтэнэр СӨ Государственноһын Күннэрин уратыларын, суолтатын быһаардылар. Чулуу дьоммутугар сүгүрүйэн, махтанан үйэтитии үлэтэ барарын, өрөспүүбүлүкэбит өссө үрдүк үрдэллэри ыларыгар, бөҕөргүүрүгэр үлэ ыытылларын эттилэр.
Алексей Ильич үөрүүлээх быһыыга 14 саастарын туолан, РФ гражданнарынан буолбут М.К. Аммосов аатынан Хатырык орто оскуолатын 8-с кылааһын үөрэнээччилэригэр Аэлита Бочуроваҕа, Валерия Винокуроваҕа, Мичийэ Дьяконоваҕа, Тимур Кутуковка, Лилия Местниковаҕа, Эльза Обутоваҕа паспордарын туттарда.
Үрдүк трибунаттан И.Е. Винокуров 130 сылынан быйыл ыытыллыбыт “Винокуровскай ааҕыылар” кылаан кыайыылааҕа Мирослав Неустроев “Илья Егорович Винокуров – дьоһун салайааччы” дакылаатынан иһитиннэрии оҥордо. Өрөгөйдөөх күн тэрээһинэ Андрей Слепцов толоруутугар “Туойуоҕуҥ Ылдьааны” патриотическай ырыанан түмүктэннэ.
Салгыы үөрүүлээх тэрээһин ыҥырыылаах ыалдьыттара, оскуола үөрэнээччилэрэ СӨ Государственноһын историятын түмэлин кытта сэргэстэһэ турар “Өрөспүүбүлүкэ скверигэр” мас олордуутун акциятыгар кытыннылар. Хатырык киинигэр баар, дьон-сэргэ, ыччат, оҕо-аймах сөбүлээн сынньанар миэстэтэ инникитин күөх үүнээйинэн киэркэйиэ, тупсуо.
Касьян Олесов-Олук.
Хаартыскалар: ааптар түһэриитэ