Нам улууһун баһаары утары сулууспатын үлэһитэ, лейтенант Сергей Гоголев, Ленскэй нэһилиэк олохтоох дьаһалтатын ыксаллаах быһыыга-майгыга специалиһа Дьулустан Макаров Нам сэлиэнньэтигэр баһаартан утары сэрэтии үлэтин тиһигин быспакка ыыталлар.
“Сэрэхтээх буолуу быраабылаларын, ирдэбиллэрин хас биирдиибит тутуһара, толороро наада”, – диир Дьулустан Алексеевич.
Оттуллар оһохтоохтор оһохторун билиитэтэ бүтүн, хайдыыта суох буолуохтааҕа этиллэр. Оһох иннигэр ылтаһын хайаан да баар буолуохтааҕа ыйыллар. Маһы кыстыыр, бөҕү-саҕы кутар наадата суох. Оттуллан турар оһоҕу көрүүтэ суох хаалларан барыы тахсыа суохтаах. Оттон гаас оһоҕу оҕо туттара кытаанахтык бобуллар. Дьиэҕэ гаас сыта үөскүүр түгэнигэр, оһоҕу хаһаайын тыыппакка дьиэни салгылатыахтаах уонна суһаллык тустаах үлэһиттэргэ эрийэн 04 сулууспаны ыҥырыахтаах.
Баһаартан сэрэхтээх буоларга уонна суһал көмөнү оҥорорго дьиэҕэ баһаарынай тэрил (АДПИ), огнетушитель баар буолуохтаах.
Кыра оҕолору көрүүтэ-истиитэ суох дьиэҕэ хаалларымаҥ! Оҕо илиитэ тиийэр, көстөр сиригэр испиискэни, зажигалканы уурумаҥ! Компьютеры, ноутбугу күнү быһа холбуур кэмҥэ, уот ситимэ ыарырҕаппатын туһуттан, фильтрдары, аптамаат предохранителлэри туһаныҥ. Электрическэй прибордар, уоту кытта ситимнээх тэриллэр алдьаныылаах буоллахтарына, уларытыҥ.
Олорор дьиэҕэ баһаарынай ирдэбили толоруу хас биирдии хаһаайын эбээһинэһэ буоларын Дьулустан Алексеевич, Сергей Сергеевич өссө төгүл санаталлар, сүбэлииллэр.
Ленскэй нэһилиэк пресс-киинэ