СӨ Ил Дархана Айсен Николаев 2023 с үөрэнээччилэр спартакиадаларын сөргүппүтэ. Ол кэмтэн ыла «Спортивные якутяне» СӨ үөрэнээччилэрин спартакиадата сыл аайы ыытыллар. Быйылгы спартакиада түмүктүүр күрэхтэһиилэрэ бэс ыйын 4 күнүттэн саҕаланнылар.
Нам улууһуттан уопсайа 51 оҕо 5 көрүҥҥэ кытталлар: тустуу, бокс, волейбол, мас-рестлинг, чэпчэки атлетика.
Нам улууһун оҕо спордун киинин дириэктэрэ Михаил Парников:
«Волейболга кыргыттар хамаандаларыгар, тустууга уонна чэпчэки атлетикаҕа эрэл баар. Быйыл былырыыҥҥы курдук 2-с миэстэни ыларбыт ыарахаттардаах.
Күрэхтэһии үөрүүлээх аһыллыыта сарсын, бэс ыйын 5 күнүгэр, Туймаада стадиоҥҥа буолар. Нам улууһун баһылыгын солбуйааччы Егор Протопопов, Нам улууһун үөрэҕин управлениетын начальнига Мария Игнатьева кыттааччылары эҕэрдэлиэхтэрэ».
Бэлиэтээн эттэххэ, бокс «Триумф» спорт комплексыгар бэс ыйын 4-8 кк, волейбол «50 лет Победы» спорт дыбарыаһыгар бэс ыйын 4-5 кк, «Стерх» 6 нүөмэрдээх спорт оскуолатыгар бэс ыйын 6 күнүгэр, көҥүл тустуу ИФКИС тустуу саалатыгар бэс ыйын 6-7 кк, чэпчэки атлетика «Туймаада» стадиоҥҥа бэс ыйын 6-7 кк, мас-рестлинг В.Манчаары аат спорт национальнай көрүҥнэрин киинигэр бэс ыйын 6-7 кк ыытыллыахтара.
Спартакиадаҕа 30 улуус хамаандаларыттан 1154 үөрэнээччи кыттыыны ылыахтара.
Дарина Константинова