И.С. Гаврильев аатынан Намнааҕы 1 №-дээх орто оскуолаҕа психолого-педагогическай 10 “В” кылаас аһыллан үлэтин саҕалаата. Бу туһунан оскуола дириэктэрэ Николай Парников «ВКонтакте» социальнай ситимигэр суруйда.
Профильнай үөрэҕи сайыннарар система чэрчитинэн, Нам улууһугар психолого-педагогическай кылаас үөрүүлээх быһыыга-майгыга аһылынна. 10 “В” кылаас салайааччыта – Екатерина Николаевна Матвеева. Бу түгэн оскуола оҕолорун инники идэлэрин эрдэттэн быһаарынар уонна педагогическай каадырдары бэлэмниир суолтатын бэлиэтиир.
Үөрүүлээх тэрээһиҥҥэ Нам улууһун үөрэҕин управлениетыттан Егор Бочонин, Намнааҕы педагогическай колледжтан Ольга Васильева, оскуола дириэктэрэ Николай Парников, наставник учуутал Марианна Рожина кыттыыны ыллылар.
Егор Иннокентьевич үөрэнээччилэргэ педагогическай идэ улахан суолталааҕын этэн туран, улуус үөрэҕин управлениетын өттүттэн өйөбүл баарын бэлиэтээтэ. Николай Григорьевич үөрэнээччилэр инники профессиональнай олохторугар оскуола улахан кылааттаҕын кэпсээтэ. Ольга Алексеевна психолого-педагогическай кылааска үөрэммит оҕолор салгыы педколледжка үөрэнэр кыахтаахтарын, инникигэ кэскиллээхтэрин бэлиэтээн эттэ. Салгыы Марианна Дмитриевна учууталга тус эппиэтинэс баар буолуохтааҕын, эмпатия уонна куруук бэйэни сайыннарыы суолтатын тоһоҕолоон бэлиэтээтэ.
Бу күн “Огонь преемственности” диэн сиэр-туом ыытылынна. “Огонь преемственности” учууталлар көлүөнэлэрин ситимнэрин, үгэстэри харыстыырга уонна профессиональнай уопуту улахан көлүөнэттэн кыраларга тиэрдиини көрдөрөр. Маны тэҥэ, оҕолорго саҥа статуһу — “Будущие педагоги” диэн көрдөрөр бейджик туттардылар.
Бэйэ информ.
Хаартыскалар: Николай Парников ВКонтакте соц.ситимиттэн