Аҕам саастаахтар декадаларын чэрчитинэн, алтынньы 7 күнүгэр, Т.К. Ядрихинская аатынан Намнааҕы социальнай-геронтологическай кииҥҥэ Дьокуускай куорат 3 N-дээх РБК иһинэн үлэлиир «Гериатрдар, геронтологтар Дьокуускайдааҕы өрөспүүбүлүкэтээҕи обществоларын» гериатра Евгения Аммосова, ЛФК инструктора Алексей Варламов үлэлээтилэр.
Кинилэр «Центр сопровождения памяти «Нейрофит» бырайыак чэрчитинэн аҕам саастаахтар ортолоругар түөһэйии ыарыытын сэрэтэр, харыстанар тэрээһиннэри ыыттылар.
ЛФК тренерэ Алексей Варламов киин аҕам саастаахтарыгар анаммыт «Доруобуйа оскуолатын» иһинэн дьарыктары көрдөрдө:
-иммерсивнэй сэрээккэлэри;
-аҕам сааска когнитивнай кэһиллиилэри сэрэтэр хамсаныылары;
-«Көдьүүстээх нейробика уонна Когни-пак» комплекснай дьарыктары, маастар-кылаас ыытта.
Нейротренер киин үлэһиттэригэр нейрогимнастика туһунан билиһиннэрдэ. Бэйэтин анал дьарыгын уопутуттан үллэһиннэ.
Гериатр Евгения Аммосова киин үлэһиттэригэр, нейротренердэргэ, деменциялаах аҕам саастаахтары кытта хайдах үлэлэһэргэ үөрэтэр семинар ыытта. Кинилэргэ көмө буклеттары, гериатрия киинин үлэтин уопутун билиһиннэрэр методическай ыйынньыктары, эмэ суох ыарыыны сэрэтэр, эмтиир ньымалары билиһиннэрдэ. Пациеннары кытта үлэлэригэр туттар когнитивнай ковриктары, муфталары туттарда. Кииҥҥэ стендэни, баннеры бэлэхтээтэ.
Евгения Аммосова киин дириэктэрэ Инна Сивцеваны кытта 2027 с. гериатрия киинигэр эмтэниигэ 5 квота бэриллэр сөбүлэҥэр илии баттастылар, сертификаты туттарда. Туһалаах видеороликтары көрдөрдө.
Т.К. Ядрихинская аатынан Намнааҕы СГК үлэһиттэрэ ахсыа буолан быйыл сайын «Нейрофит» бырайыак чэрчитинэн анал үөрэҕи ааспыттара. Ол туһунан киин психолога Күннэй Парникова санаатын үллэстэр.
Кииҥҥэ ретро-музей аһылынна
«Нейрофит» бырайыак чэрчитинэн ретро-муннук аһан үлэлэтии ирдэммит буоллаҕына, кииҥҥэ сэбиэскэй кэми санатар ретро-музей хоһо аһылынна.
Лиэнтэни киин дириэктэрэ Инна Сивцева, И. С. Шарапов аатынан Никольскайдааҕы сир музейын дириэктэрэ Прасковья Протопопова уонна урукку кэмҥэ Намнааҕы кыраайы үөрэтэр музейга дириэктэрдээн ааспыт Айталина Павлова быһа кырыйдылар.
Бары олорон ааспыт кэмнэрин кэрэһэлиир экспонаттардаах музей аһыллыбытынан Прасковья Романовна, Инна Иннокентьевна истиҥник эҕэрдэлээтилэр. Бары күргүөмүнэн ырыа толордулар.
Прасковья Романовна бөлөхтөрүнэн экскурсиялатан, музей үлэһиттэрэ туруорбут уонна киинтэн эмиэ аҕалбыт экспонаттарын сырдатта. Ыалдьыттар, олохтоохтор музейы сэҥээрэ көрдүлэр. Киин үлэһиттэрэ бэйэлэрин кыахтарынан музейы өссө байытар санаалаахтарын биллэрдилэр. Олус астыннылар.
Касьян Олесов-Олук, киин волонтера
Ааптар видеолара, фотолара