Нам сэлиэнньэтин “Нэлэгэр” түөлбэтигэр “Мой двор – моя гордость-2024” тэлгэһэ конкурса түмүктэннэ. Үтүө үгэскэ кубулуйан сылын аайы ыытыллар конкурс олохтоохторго бырааһынньык тэҥэ буолла.
Ол курдук, Нэлэгэр ыаллара тэлгэһэлэрин тапталынан уонна кыһамньынан киэргэтэр буолбуттара бэлиэтэнэр. Тэрийээччилэр “Мой двор – моя гордость-2024” тэлгэһэ конкурса кыайыылаахтарын уонна анал аатынан наҕараадаламмыттары ис сүрэхтэриттэн эҕэрдэлииллэр!
Бу сылга муҥутуур кыайыылаахтарынан Светлана Пантелеймоновна, Лука Лукич Поповтар ааттаннылар. Кинилэр олбуордара дэҥҥэ көстөр оҥоһуутунан, тутуутунан, сөптөөхтүк кэрэ көстүүлээх гына киэргэтиитинэн, мастарынан, үүнүүлээх оҕуруот астарынан сөхтөрдө.
I истиэпэннээх дипломанынан Екатерина, Гаврил Паньковтар наҕараадаланнылар. Тиэргэннэрэ үрдүк таһымнаах тупсарыыга олоҕурар. Екатерина уонна Гаврил болҕомтолорун сылтан-сыл үүнэр, сайдар мастары олордууга уураллар.
II истиэпэннээх диплому Екатерина, Дмитрий Елисеевтар дьиэ кэргэн туталлар. Елисеевтар ыал ойуулуур-дьүһүннүүр, айымньылаах буолууларынан үөрдэллэр. Кинилэр тэлгэһэлэрин бүтүн дыбарыас оҥорбуттар. Конкурспут кэрэ көстүүтүнэн буолла – олус үчүгэй фонтан оҥорбуттара. Фонтаннаах дыбарыас тэлгэһэни киэргэтэрин таһынан, аптаах дойдуга сылдьар эйгэни олохтуур.
“Самый зелёный двор” анал аат кыайыылааҕынан Никоновтар дьиэ кэргэн буоллулар. Оҕуруот, сибэкки араас көрүҥнэринэн, мастарынан симэммит күөх тэлгэһэ киһи хараҕын бэйэтигэр тардар. “Самым ухоженный двор” анал аат Захаровтарга тиксэр. Ол курдук, кинилэр хас биирдии муннуктарыгар бэрээдэк уонна иэйии баар тута биллэр. “Инновации во дворе” анал аатынан Валентина Колодезникова олбуора бэлиэтэнэр. Кини тупсарыыга эрдэттэн өйгө-санааҕа толкуйдаммыта сөхтөрөр. Валентина бэйэтин илиитинэн оҥорбут үлэлэрэ – фигуралар, гиипсэттэн оҥоһуктар, гирляндалар, лаампалар.
Маргарита Чеснокова анал бирииһин Анисия Винокурова олбуора ылар. Анисия айаан-тутан таһаарбыт үүнүүлээх, табыгастаах, кэрэ тэлгэһэтэ туһунан болҕомтону эрэйэр.
Түөлбэбит олохтоохторугар көмөлөрүн, кыттыыларын иһин, тэрийээччилэр күүскүтүн ууран оҥорор конкурскут иһин барҕа махтал буоллун. Эһиги ис сүрэхтэн тахсар кыһамньыгытан, тапталгытынан киэргэтэр тиэргэннэргит түөлбэбитигэр бастыҥ эйгэни тэрийэр, олохтуур.
“Нэлэгэр” түөлбэ актива