Никольскайга 30- ча киһи кэлэн отчуоту иһиттэ. Дьоҕус нэһилиэк дьоно-сэргэтэ биир дойдулаахтарын, Аҕа дойду Улуу сэриитин ветерана Егор Протопопов сиэнин, бөлөх салайааччытын, Уһук Илин федеральнай уокурукка СӨ бастайааннай бэрэстэбиитэлэ Ким Борисовы үөрэ көрүстүлэр, кининэн киэн тутталларын, астыналларын эттилэр. Ким Александрович иккис сылын отчуот бөлөҕүн салайарын, быйыл анаан-минээн Никольскайга кэлбитин билиннэ. Алын сүһүөх оскуолаҕа робот бэлэхтээтэ.
Никольскай олохтоохторо туруорсубуттара 30-ча сыл буолбут оскуола тутуутун быйыл да тумнубатылар. Нэһилиэк кэҥиир, дьон ахсаана эбиллэр. Киэҥ хонууга гаас киирбит, уота тардыллан эрэр. Ыччат олохсуйар, дьиэ-уот туттар, кэтэх хаһаайыстыба тэринэр. Онон 9 кылаастаах оскуола туруорсаллар. Олохтоохтор бэйэлэрэ ааҕыыларынан билиҥҥитэ 90-ча оҕо улууһунан ыһыллан үөрэнэр диэтилэр.
Онуоха эппиэттээх үлэһиттэр оскуола тутуута уочаракка 55-с миэстэҕэ турарын, докумуону үчүгэйдик бэлэмнииллэригэр, уочарат түргэнник хамсыырын быһаардылар.
Иккис балачча сытыытык турбут ыйытыынан ФАП тутуута буолла. Олохтоох көрдөрүнэр пуун хаарбаҕынан сабыллан турар. Нэһилиэнньэ Хамаҕаттаҕа баран көрдөрүнэр. Нам улууһун кылаабынай бырааһа быһаарбытынан, тутуу уочаракка киирбит. Сотору кэминэн социальнай эбийиэккэ анаммыт дьиэ тутуута бүттэҕинэ, көрдөрүнэр пуун онно олохтонуоҕа. Маныаха наадалааҕынан хааччыллыыга үп көрүллүбүт.
Саха ынаҕын этин, үүтүн ыйыттылар. Ахсаанын эрэ элбэтиигэ буолбакка, бородууксуйатын сурастылар.
Бу курдук араас боппуруостарга тохтоон, дьүүллэһэн, өйдөһөн отчуоту биһирииллэрин биллэрдилэр.
Бэйэ информ.
Хаартыскалар: Нам улууһун дьаһалтатын пресс-сулууспата