Улууска бурдук үүннэриитин саҕалааччы Ньукуолускай нэһилиэгэ Ньукуолун күнүн көрсөр тэрээһин ыытта.
И.С. Шарапов аатынан сири туһаныы түмэл тиэргэнигэр нууччалыы көстүүмнээх дьон, олохтоох оскуола оҕолоро үгэс буолбут нэһилиэктэрин төрөөбүт күнүгэр муһуннулар.
Нууччалыы тыыннаах киэргэтии нэһилиэк историятын сорҕото буолара тута өйдөнөр.
Кэлбит ыалдьыттар куорат коллекционердарын «Самовар Самоварыч» быыстапкаларыгар араас сылабаардары көрдүбүт, историятын түмэл дириэктэрэ Парасковья Протопопова кэпсээнин кэрэхсээн иһиттибит.
Сылабаар өрүүтүгэр эр дьоҥҥо күрэх буолла. Сылабаардаах итии чэйинэн, мүөттээх алаадьынан күндүлээн сиэри ситэрдилэр.
Бырааһынньык саамай сүрүн сыала: бэлэм оҥоһуллубут сиргэ оскуола оҕолоро былыргылыы сүгэ сылдьан тэрэпиискэ суумкаттан, туос чабычахтан илиилэринэн бурдук ыстылар, ону кыраабылынан бараналаатылар. Ыһыы үлэтэ бүппүт үөрүүтүгэр оонньоотулар, ыллаатылар.
Ыспыт бурдуктарын күһүн оҕолор сиэрпэнэн быһаллар эбит. Оттон хаттаҕына суоруналаан, алаадьылаан сиэтэллэр. Ити курдук, оҕолор килиэп хантан, хайдах кэлэрин билэ үөрэнэллэр, нэһилиэктэрин историятын билэ улааталлар.
Араас фотозонаҕа хаартыскаҕа түһэн, музей көрөн, үлэһиттэр иитэр-үөрэтэр үлэлэрин хайҕаан, түмэл аналын толору туһанарын биһирээн тарҕастыбыт.
Мария Винокурова