Аҕам саастаахтар норуоттар икки ардыларынааҕы күнүн декадатын чэрчитинэн, итиэннэ Тыа хаһаайыстыбатын уонна астыыр-үөллүүр салаа үлэһиттэрин күнүнэн, «Эрэл» ТХПК коллектива бэтэрээннэрин эҕэрдэлээн туран бэйэлэрэ оҥорон таһаарар бородууксуйаларын бэлэх ууммуттар.
Тыа хаһаайыстыбата олохтоох норуот сүрүн дьарыга, кэскилэ уонна инники күөҥҥэ турар биир сүрүн салаата буолар. Бэйэ бородууксуйатын оҥорон таһаарыыга болҕомто күүскэ ууруллар.
Ньургун Гуляев, «Эрэл» ТХПК директора:
— Икки бэлиэ күнү сөп түбэһиннэрэн 55 саастарыттан үөһээ саастаах коллегаларбытын, бочуоттаах сынньалаҥҥа олорор ветераннарбытын эҕэрдэлээн, бэйэбит бэлэхпитин туттартаатыбыт. Идэлэригэр бэриниилээх, кооператив сайдыытыгар, олохтоох ас дэлэйэригэр олохторун анаабыт, эдэр ыччакка холобур буолар, өр сылларга бу эйгэҕэ үлэлээбит дьоммутугар истиҥ эҕэрдэбитин этэбит. Эһиги сыралаах үлэҕитин үрдүктүк сыаналыыбыт!
Семен Аргунов