(40 сыл анараа өттүгэр бу күн)
Ыам ыйын 15 күнүгэр “Кэскил” (Бэлэм буол) оҕо хаһыата үбүлүөйдээх 90 сылын бэлиэтээтэ.
Хаһыат маҥнайгы нүөмэрэ 90 сыл анараа өттүгэр, 1936 сыллаахха, бэчээттэммитэ. Онтон ыла элбэх оҕо бу хаһыакка суруйтаран, ааҕан, бэйэтэ суруйан кэллэҕэ. Сорох хаһыакка бэчээттэнэн, сорох бэйэтин туһунан ааҕан, онтон үөрэн кынаттаммыт элбэх буолуо. Сахалыы тыллаах оҕо хаһыата оскуола оҕолорун, оччотооҕу пионердары араас өрүттээх иитэр-үөрэтэр үлэҕэ көҕүлээн, гражданскай инициативаларын сайыннаран кэллэ. Ол туһунан улууспут “Ленин суола” хаһыатыгар “Бэлэм буол” 50 сылынан 1986 сыл ыам ыйын 17 күнүгэр Хамаҕатта орто оскуолатын Ю.А. Гагарин аатынан пионерскай дружинатыгар анаммыт балаһаны көрөбүт.
Онтон оҕолор суруйууларыттан быһа тартахха: “Биһиги интернационалистарбыт” рубрикаҕа дружина советын председателэ, 6 кылаас үөрэнээччитэ Софронова Лена “Араас омук оҕолоро доҕордостубут” диэн суруйуута бэчээттэммит. “Мин быйылгы үөрэх дьылыгар Бүтүн Союзтааҕы пионерскай Артек лааҕырга сынньанан кэллим. Саха сириттэн 25 буолан барбыппыт. Үөдэй орто оскуолатыттан Сардаана Романова сынньанна. Артекка араас сирдэртэн кэлбиттэр биир кэргэн оҕолорун курдук сырыттыбыт”.
Габышева Соня, дружина үөрэххэ сектора: “Биһиги дружинабытыгар 121 оҕо баар. Партия XXVII съеһин матырыйаалларын кытта билсиһэбит. Съезд үлэлиир күннэригэр учебниктар туруктарын уонна диссипилиинэни бэрэбиэркэлээн рейдэлэри оҥордубут. В.И. Ленин туһунан 200 кинигэни ыалларга атыылаатыбыт. Съезд аһыллыбыт күнүнэн эҕэрдэ открыткалары кырдьаҕас коммунистарга тарҕаттыбыт. Тимуровскай үлэҕэ бары кылаастар таҕыстылар”, — диэн “Көмөбүт туйгун үөрэх” төбөлөөн суруйбут.
Винокурова Надя, 5 кылаас үөрэнээччитэ: “Үлэ киһитин уруйдуубут”: “Биһиги 5 кылаас үөрэнээччилэрэ “Үлэ киһитин уруйдуубут” диэн ааттаах тылынан сурунаалы ыыттыбыт. Онно 14 оҕо кытынна. Биһиги оройуоммут инники иһэр үлэһит дьоннорун туһунан иһиттибит”.
Посельская Надя: 6 кылаас: “Эйэ туругурдун”.“Биһиэхэ эдэр антифашист күнүгэр эйэ кыракый посолугар Саманта Смиккэ аналлаах конференция буолбута”. Маны таһынан Заровняева Венера“Баһаатайдыыр үчүгэй”, Громова Марианна “Пионерга киирдибит” суруйуулара, үчүгэй үөрэнээччилэр Винокурова Надя(7 кыл.), Кривошапкин Вася(8 кыл.) туһунан сырдаппыттар.
Оскуола пионер баһаатайа Вера Алексеевна Чирикова: “Бэлэм буол” республика пионердарыгар кэрэхсэбиллээх күрэхтэһиилэри ыытар. Холобура, “Хайыһарынан Хотугу полюска”, “Якутскай –Ильмень”, “Якутскай – Сараево”, “Модун санаа трассата”, “Пионерскай дружина летопиһа”, “Республика коммунистарын биир күнэ” уо.д.а. Манна барытыгар биһиги пионердарбыт активнайдык кыттан Артек, Орленок, Океан лааҕырдарга босхо сынньанан кэлбиттэрэ. Быйыл “Республика коммунистарын биир күнэ” конкурска бастааммыт алтыс кылаас үөрэнээччитэ Олег Протопопов Артек лааҕырга барда. “Бэлэм буол” тыһыынчанан ыччаты иитиигэ көмөлөстө. Олох суолугар киллэристэ. Дэгиттэр сайдыылаах, туһалаах дьон буола улааталларыгар көмөлөһөр, — диэн “Биһиги “Бэлэм буолбут” 50 сыла” заметкатыгар хаһыат суолтатын бэлиэтээн эппит. Методист-баһаатай, норуот үөрэҕириитин туйгуна Вера Алексеевна Чирикова уһуйбут оҕолоро олоххо суолларын, идэлэрин булан дьоһун дьон буолан олох үөһүгэр сылдьаллар.
Хамаҕатта орто оскуолатын пионерскай дружинатын 40 сыл анараа өттүгэр бу күн “Бэлэм буол” үбүлүөйдээх сылынан “Ленин суола” сырдаппыт.
Хаартыска: keskil14.ru сайт
Мария Винокурова