Намнааҕы киин балыыһа быраастарын десана ыраах сытар Салбаҥҥа баран кэллэ. Ол курдук, олунньу 25 күнүгэр терапевт-быраас, педиатр, эндокринолог, невролог, гинеколог, дерматолог, офтальмолог, УЗД-бырааһа, нарколог барыта 363 улахан киһини, 38 оҕону көрдүлэр.
Маны тэҥэ 193 чинчийии, 33 ФЛГ, 55 ЭКГ, 55 анализ, 40 УЗИ оҥоһуллубут, 55 киһи диспансеризация барбыт. Дьахтар репродуктивнай доруобуйатын чинчийии диспансеризацията 4 дьахтарга оҥоһуллубут.
Л.В. Касьянова, Салбаҥ олохтооҕо:
Биһиги, Салбаҥ олохтоохторо, улууспут саамай ыраах нэһилиэгэр быраастар бу курдук кэлэн үлэлииллэрин улахан суолталаах, булгуччулаах диэн сыаналыыбыт. Миэстэтигэр анализ туттарбыппыт, быраастарга көрдөрбүппүт олус табыгастаах, хас биирдии киһиэхэ наадалаах. Инникитин быраастар аныгыскы сырыыларын күүтэ хааллыбыт.
Сыл устата маннык үлэ улуус бары нэһилиэктэрин хабан ыытыллыаҕа диэн киин балыыһа телеграм ханаала иһитиннэрэр.
Бэйэ информ.