Нам улууһугар «Дьиэ кэргэн экономикатын сайыннарыы» диэн муниципальнай тус сыаллаах программанан туһаммыттар сүөһүнэн буолбакка, түргэнник ситэр дьиэ көтөрүнэн идэһэлэниэхтэрэ.
«Чоппуусканы күһүн ааҕаллар» диэн өс хоһооно баар. Биһиги ыалларбыт ус сайын хаһаайыстыбаларын үчүгэйдик көрөн-истэн, биири да энчирэппэккэ сайылатан улаатыннардылар. Бу саас быыкаа бэйэлээх чоппуускалар билигин 20-чэ кг диэри ыйааһыннаннылар.
Дьэ, бу курдук, тус сыаллаах муниципальнай программа үлэлээн, дьиэ кэргэн туруктаах буолуутугар төһүү көмө буолар.
Программа 2020 сылтан үлэлиир. Бастакы икки сылга олох аҕыйах көрүҥ баар этэ, ол эбэтэр, куурусса, бройлер уонна чоппууска.
Онтон нэһилиэнньэ туруорсан эбии көрүҥнэр – чооску, индюк, хаас, кус оҕото, кролик, коза, перепелка, убаһа, бургунас, мүөттээх ыҥырыа (пчелопакет) киирэн биэрбиттэрэ.
Быйылгы быһаарыынан эбии «Бык-производитель» диэн эбиллэн, Салбаҥҥа уонна Көбөкөҥҥө төрүөҕү элбэтиигэ анаан оҕус атыыласпыттар.
2024 сыллаахха сааскы халаан уута ылбыт нэһилиэктэригэр «Дьиэ кэргэн экономикатын сайыннарыы» программанан туһанааччылар атыыласпыт ороскуоттарын улуус бюджетыттан 40%, олохтоох дьаһалтаттан 20% — уопсайа 60% толойууну ылбыттара. Онтон быйыл хамыыһыйа быһаарыытынан суола-ииһэ мөлтөх уонна өрүс уҥуор нэһилиэктэргэ 40/20, онтон атын нэһилиэктэргэ 20/20%-нан хаалбыт.
Бу сылга пилотнай бырайыак быһыытынан Көбөкөҥҥө, Никольскайга, Салбаҥҥа сылгыта суох ыал иитиигэ анаан убаһа атыыластаҕына, улуус бюджетыттан ороскуот 40%-на толойуллар.
Быйыл «Дьиэ кэргэн экономикатын сайыннарыы» муниципальнай тус сыаллаах программаҕа улуус бюджетыттан 3,5 мөл. солк. көрүллүбүт.
Бэйэ информ.