Нам сэлиэнньэтин «Строительнай» түөлбэтэ саас, күһүн, кыһын атыы-эргиэн дьаарбаҥкатын тэрийэр үгэстээх. Бүгүн, бэс ыйын 5 күнүгэр, түөлбэ депутата Анна Гоголева көҕүлээһининэн, түөлбэ салайааччыта Вера Прокопьева уонна олохтоохтор өйөбүллэринэн, бэйэлэрин спортивнай былаһааккаларыгар төрдүс төгүлүн атыы-эргиэн дьаарбаҥкатын тэрийдилэр. Олохтоохтор булан-талан, сибэкки арааһын атыылаһан дьиэлэрин аттын тупсараллар, оҕуруот аһын рассадатын ылан күһүн сибиэһэй аһынан хааччыналлар.
Бүгүн халлаан ичигэс буолан биэрдэ. Ааспыт сыллардааҕар атыы-тутуу аҕыйах курдук. Ол да буоллар олохтоохтор кэлэн сылдьыылара, атыылаһыылара элбэх. Ким баҕалаах корнхол оонньоотулар. Дьаарбаҥкаҕа «Түөлбэ» оҕо кииниттэн, атын да түөлбэлэртэн, баҕалаахтар кэлэн сибэкки, рассада арааһын, хортуоппуй, Аппааныттан Николай Сучко ыыһаммыт эт, балык атыылаатылар.
Варвара Филиппова:
— «Түөлбэ» оҕо эйгэтин киинин «Сайдыс» оҕо бизнес-инкубаторын иһинэн үлэлиир куруһуокка олордуллубут рассадалары атыылыы турабыт. Манна петуния, кохия, бархатцы, сальвия онтон да атын сибэккилэр бааллар. Ону таһынан оҕурсу, помидор, баклажан, тыква бааллар. Атыыбыт син барда.
Анна Челикова:
— «Строительнай» түөлбэ дьаарбаҥкатыгар кэлэммин кыттынным. «Хандыга» диэн сорттаах клубниканы начаас атыыластылар. Вегетативнай сибэккилэри атыылаатым, ону таһынан ыаллыы олорор дьүөгэм лобелия ыыппыта.
Ксения Слепцова:
— Дьаарбаҥкаҕа ыҥырыынан кэлэн турабын. Дьиэ иһигэр уонна таһырдьа үүнэр сибэкки арааһын уонна оҕурсу рассадатын атыылаатым. Атыым балай эмэ барда. «Строительнай» түөлбэҕэ ыҥырбыттарыгар махтанабын.
Людмила, Ленскэй нэһилиэк олохтооҕо:
— Биллэриини көрөн кэллибит. Оҕурсу рассадатын, ону таһынан сибэкки араастарыттан уонна сиирбитигэр хортуоппуй атыыластыбыт.
Атылааччылар, сылдьааччылар да «Строительнай» түөлбэ салайааччыларыгар махтанналлар, туһалаах дьаарбаҥка буолла.
Семен Аргунов