Бүгүн Нам с. «Эҥсиэли» стадионун А.А. Игнатьев мемориал-скверигэр улууспут сүүмэрдэммит хамаандатын спортсменнара Таатта улууһугар ыытыллаары турар ХХII-с «Манчаары оонньууларын» Спартакиадатыгар Нам улууһун чиэһин ситиһиилээхтик көмүскүүллэригэр анаммыт сүрү көтөҕүү сиэрэ-туома ыытылынна.
Тэрээһин олоҕун спорт сайдыытыгар анаабыт, Нам улууһун өрөспүүбүлүкэҕэ, дойдуга ааттаппыт киэн туттар биир дойдулаахпыт, СӨ физическэй культураҕа үтүөлээх үлэһитэ, РФ физическай культуратын туйгуна, СӨ үөрэҕириитин туйгуна, РФ анал үөрэхтээһинин бочуоттаах үлэһитэ Александр Афанасьевич Игнатьев бюһугар сибэкки дьөрбөтүн уурууттан саҕаланна.
Улууспут хамаандатыгар өрөгөйдөөх кыайыы-хотуу кэлэрин, спортсменнарга сүр көтөҕөр, кут иҥэрэр, санаа бөҕөргүүр, күүрээн-эрчим киирэр алгыс сиэрин-туомун Тэтим Буурҕат-Лоҥхо Уус ыытта, ситиһиилээх түһүлгэни баҕарда.
Спортсменнарга үтүө-мааны тылларын, биир санааҕа түмүллэн, спорт туонатыгар кимиилээхтик киирсэн, хотуулаахтык күрэстэһэн, Эҥсиэли хочотун, Нам сирин ааттаталларыгар баҕа санааларын, сүбэлэрин-амаларын Нам улууһун баһылыга Юрий Слепцов, А.А. Игнатьев олоҕун аргыһа Маргарита Игнатьева, спортка, физическэй культураҕа управление начальнига Павел Иванов тиэртилэр, Нам былааҕа күөрэйэн, өрүү инники күөҥҥэ тахсары баҕардылар.
Санатан эттэххэ, ХХII-с «Манчаары оонньууларын» Спартакиадатыгар күөн күрэс спорт 11 көрүҥэр – хапсаҕай, гиирэ анньыыта, мас тардыһыыта, атах оонньуута, чэпчэки атлетика, саха дэгит күрэһэ, хотугу дэгит күрэс, төрүт оҕунан ытыы, хабылык, хаамыска оонньуута, буулдьанан ытыы, ат сүүрдүүтэ буолар. Манна биһиги улууспут 117 бастыҥ спортсменнара путевканы ылбыттара.
Бу күннэргэ Нам улууһун сүүмэрдэммит хамаандатын 117 спортсмена, 22 тренер, 10 бэрэстэбиитэл Тааттаҕа айанныахтара. Чулуу спортсменнарбытыгар кыайыыны-хотууну, ситиһиилээх түһүлгэни баҕарабыт.
Касьян Олесов-Олук,
Видео:Роман Шапошников