Хамаҕатта нэһилиэгин «Тускул» оҕо сайдар киинэ балаҕан ыйын 3 күнүттэн аанын тэлэччи арыйан үлэтин саҕалаабыта. Саҥа үөрэх сыла хайдах саҕаламмытын, үлэ сүрүн тосхоллорун сэбиэдиссэй Аида Местникова Россияҕа Иитээччи күнүн көрсө билиһиннэрэр:
— Бу саҥа үөрэх сылыгар барыта 165 оҕо хабыллан сылдьар, 78 үлэһит баар. Оҕолору 1 саастарыттан ылабыт. Барыта 11 группа үлэлиир. Ол иһигэр хонуктаах группа, доруобуйаларынан хааччахтаах уонна инбэлиит оҕолорго анал группалар үлэлииллэр. Оскуола иннинээҕи үөрэхтээһиҥҥэ оҕону эт-хаан, өй-санаа, билии-көрүү өттүнэн сайыннарыы, кэрэҕэ уһуйуу, дойдуга бэриниилээх буолууга иитии — сүрүн соруктарынан буолаллар.
Эбии үөрэхтээһин педагога талааннаах уһуйааччы Октябрина Барашкова салайан иккис сылын айымньылаахтык үлэлэтэр «Оҕо картиннай галереята» оҕолору тулалыыр эйгэттэн кэрэҕэ иитиини, кэрэни сайыннарыыны сорук оҥостон, араас өрүттээх үлэни былааннаан ыытар.
Бу үөрэх сыла саҕаланыытыгар «Сулусчаан» бөлөх оҕолорун, айылҕаҕа илдьэн, көмүс күһүн кэрэ бэлиэлэрин, өҥүн — дьүһүнүн өйдөөн көрөн, нетрадиционнай методиканы туһанан хартыынаҕа түһэрии кистэлэҥин көрдөрөн уруһуйдаппыта. Оҕолор саҥа элбэх билиини-көрүүнү ылан, астынан, айылҕа ыраас салгынынан дуоһуйа тыынан үөрэн-көтөн, кэпсээн кэһиилээх кэлбиттэрэ.
Дьиэ кэргэн төрүт үгэһин тарҕатааччылар, иҥэрээччилэр, уһуйааччылар кэргэннии Андрей уонна Елена Осиповтары, Намнааҕы педагогическэй колледж преподавателлэрэ, Россияҕа дьиэ кэргэн сылыгар анаан «Ымыылаах ыал ыллыктара» быыстапкаларыгар, уһуйааммыт улахан саастаах оҕолорун ойуулуур — дьүһүннүүр ускуустуба нөҥүө оҕо өйүн-санаатын, көстүүлэр уратыларын, сибээстэрин арааран бэлиэтии көрөр дьоҕурдарын сайыннарар сыалтан, «Тускул » уһуйаантан барыта 46 оҕону илдьэн, көрдөрөн, оҕолор айымньыны ылынан, кэрэхсээн кэлэллэрин ситистэ.
«Ааҕар дьиэ кэргэн» бырайыак чэрчитинэн тэриллибит детсад иһинээҕи библиотека, саха балаҕана, остуол оонньуулара, СТЕАМ үөрэхтээһин, фольклор жанрдарынан эбии дьарыктар үлэлэрэ былааннаахтык бараллар.
Уһуйаан педагогтарын айар бөлөҕө көҕүлээн, коллектив эр дьонун күүһүнэн, аныгылыы быһыылаах, иитэр-үөрэтэр, оҕону үлэҕэ сыһыарар, кэтээн көрөр дьоҕуру сайыннарар эйгэ тэриллэн, тупсаҕай көстүүлээх оранжерея үлэтин саҕалаата.
Намнааҕы ГИБДД сотрудниктарын кытта суолга сэрэхтээх буолууга үлэ көхтөөхтүк ыытыллар. Ол курдук, балаҕан ыйын 26 күнүгэр ГАИ инспектордара кэлэн суолга сэрэхтээх буолуу туһунан кэпсээн, көрдөрөн, бэсиэдэ ыыттылар. Оҕолор коллективнай үлэлэрин ыалдьыттарга бэлэх ууннулар.
МЧС сотрудниктарын кытары үлэ эмиэ ыкса сибээстээхтик ыытыллар. МЧС-ка үлэлиир төрөппүттэр оҕолорго инструктаж кэлэн кэпсээбиттэрэ. Көрдөрөр-үөрэтэр материаллары хаалларбыттара.
Мария Винокурова