Нам улууһугар тимири ууһаарыы сөргүтүллүбүтэ 15 сылыгар аналлаах өрөспүүбүлүкэтээҕи «УОТТААХ ТИМИР» тэрээһин уот иччитигэр сүгүрүйүү алгыһын сиэриттэн-туомуттан саҕаланна. Алгыһы П.П. Ядрихинскай — Бэдьээлэ аатынан Намнааҕы Олоҥхо дьиэтин алгысчыта Владимир Сыромятников толордо.
«Нам улууһа» МО баһылыга Юрий Слепцов, СӨ Культураҕа министерствотыттан Вера Моисеева, улуустааҕы культура уонна духуобунай сайдыы салайааччыта Семен Ядрихинскай, Россия уонна Саха сирин норуотун маастара Роман Готовцев – Мындыр Уус эҕэрдэ тыл эттилэр. Нам улууһугар өбүгэлэрбит үгэстэринэн тимири уһаарыыны сөргүтүүгэ үлэлэһэр, уопуту тарҕатар Таастаах нэһилиэгин олохтооҕор Василий Герасимовка «СӨ культуратын наставнига», «Нам улууһун уонна түмэлин сайдыытыгар кылаатын иһин» түөскэ анньыллар бэлиэлэринэн наҕараадаланна. Ону таһынан, үтүө үгэһи тарҕатар, сөргүтэр Нам уустарыгар махтал суруктары туттартаатылар. Тэрээһин кэмигэр саха сүөһүтүн идэһэҕэ туттан, кэлбит ыалдьыттарга күөс өрөн күндүлээтилэр, саха сүөһүтүн этин амсаттылар. Сүөһүнү идэһэлэниэх иннинэ толоруллар сиэри-туому өрөспүүбүлүкэтээҕи норуот айымньытын дьиэтиттэн ыыттылар.
2011 сыл сайыныгар Таастаах нэһилиэгэр Намнааҕы музей уонна краевед Герасимов Василий Иванович көҕүлээһиннэринэн аан бастаан тимири уһаарыы ыытыллыбыт. Манна Намнааҕы техническэй Дьиэ, “Эхо” лааҕыр оҕолоро, Дүлүҥ Уус сыдьааннара Жирковтар, I-Хомустаах, Таастаах, Партизан нэһилиэктэрин олохтоохторо кыттыыны ылбыттар. Былыргы тимири уһаарыы ньыматынан киэһэ биэс чаастан саҕалаан сарсыарда биэс чаас саҕана 50 киилэ таастан 14 киилэ болгуону таһаарбыттар, тутатына олохтоох уустар быһах охсон таһаарбыттар.
Тэрээһиҥҥэ икки оһоххо тимири уһаардылар, өрөспүүбүлүкэтээҕи норуот айымньытын дьиэтин үлэһиттэрэ саха сүөһүтүн идэһэҕэ туттуутун сиэрин-туомун ыыттылар, Нам, Үөһээ-Бүлүү Чап уонна Бүлүү тимир уустарын булаат буһарыытыгар, Мэҥэ Хаҥалас уонна Горнай улуустарын тар оҥоруутугар маастар-кыластары ыыттылар, Таастаах нэһилиэгин сынньлаҥ киинин үлэһиттэрэ күрэхтэһии ыыттылар. Саха сүөһүтүн этиттэн хорчуопка, туой иһиккэ күөс өрүү буолла. Тимир уустара «Бастыҥ бадаайы» күрэххэ холоннулар.
Бу күн Руслан Захаров туой иһиккэ күөс өрүүтүгэр маастар кылаас ыытта. Таастаах нэһилиэгиттэн оҕунан ытыыга күрэхтэһиилэригэр кыттыылаахтар эриэ-дэхси кииристилэр. 1 м. — Илья Заболоцкий, 2 м. — Александр Данилов, 3 м. — Эдуард Тарабукин буоланар сип-сибиэһэй саха сүөһүтүн этинэн наҕараадаланнылар.
«Уот тимир» тэрээһин икки оһоҕуттан уһааран көмөр быыһыттан кыыһа кытарбыт уопсайа 10-ча киилэ тимир болгуону хостоон эллээтилэр. Үөһээ Бүлүү Кэнтигиттэн тимир ууһа Егор Тумусов булат буһарыытыгар маастар-кылаас ыытта.
Б күн биир сүрүн уонна интэриэһинэй тэрээһининэн «Бастыҥ бадаайы» күрэхтэһии буолла. Үөһээ Бүлүүттэн, Бүлүүттэн, Горнайтан, Дьокуускайтан, Томпоттон, Кэбээйиттэн, Намтан кытыннылар. Бэйэлэрэ оҥорбут бадаайыларынан кииристилэр. Бэрт сэргэхтик ааста, түмүккэ түргэн туттунуулаах, бөҕө-таҕа бадаайылаах Андрей Винокуров (I Хомустаах, Нам), 2-кэ Виталий Слепцов (Хатырык, Нам), 3 миэстэҕэ Егор Лукин (Горнай) тигистилэр. Маны таныһан тэрийээччилэр анал бириистэрин хаһаайыннарынан буоллулар: Үөһээ Бүлүүттэн Егор Тумусов — «Биһирэмнээх уус»; Бүлүүттэн Федор Саввинов — «Бастыҥ булаат буһарааччы»; Томпо улууһуттан Альберт Захаров – «Инникилээх уус».
Бу курдук өбүгэлэрбит суолларын тэлэн, сөргүтэн ыччакка, кэлэр көлүөнэҕэ холобур буолаллар, үтүө үгэһи сөргүтэллэр.
Семен Аргунов
Видео: Роман Шапошников