Олунньу 20 күнүгэр Үөдэй нэһилиэгэр “Нэһилиэкпит сайдыыта – барыбыт түмсүүбүт” нэһилиэк күнэ үрдүк таһымҥа буолан ааста.
Ыраахтан чугастан биир дойдулаахтарбыт тоҕуоруһа мустан үөрүүлээх күнү бииргэ түмсэн атаардылар. Быйылгы сыл нэһилиэккэ “Общественность түмсүүтүн уонна уһулуччулаах композитор Василий Алексеевич Зырянов төрөөбүтэ 90 сылыгар” ананан бу күн үгүс тэрээһиннэр буоллулар.
Ол курдук, З.П.Саввин аатынан Үөдэй орто оскуолатыгар уонна “Чуораанчык” уһуйааҥҥа оҕолорго патриотическай өйгө-санааҕа иитиигэ линейкалар, тэрээһиннэр буоллулар. “Төрөөбүт нэһилиэккин төһө билэҕин?” онлайн викторина күрэххэ 12 улахан киһи кыттыыны ылан нэһилиэк историятыттан 16 боппуруоска эппиэттээтилэр. Саамай аҕа саастаах кыттааччы Дьокуускай куоракка олорор биир дойдулаахпыт Екатерина Григорьевна Соловьева буолла. Чопчу, сөптөөх хору йу, толору эппиэти суруйан “Чуораанчык” оҕо саадын музыкальнай салайааччыта Туйаара Николаевна Афанасьева кыайыылаах аатын ылла.
Саамай долгутуулаах түгэнинэн дьон-сэргэ күүтүүлээх, кэтэһиилээх общественность балаҕана үөрүүлээхтик аһыллар дьоро күнүгэр ытык-мааны ыалдьыт буоллулар. Кэлбит ыалдьыттары нэһилиэк баһылыга Иван Васильевич Гаврильев эҕэрдэлии көрүстэ.
Балаҕан аһыллыытыгар улуус баһылыгын тыа хаһаайыстыбатын салаатыгар солбуйааччы Филипп Васильевич Николаев, култуура управлениятын начальнигын солбуйааччы Александра Николаевна Новгородова, улуустааҕы бэтэрээн сэбиэтин бэрэссэдээтэлэ Софья Дмитриевна Кобякова, республикатааҕы сэрии, тыыл, үлэ бэтэрээннэрин общественнай тэрилтэтин бэрэстэбиитэлэ Вера Дмитриевна Яковлева кыттыыны ыллылар.
Үөрүүлээх быһыыга-майгыга аалай кыһыл лиэнтэни баһылык Иван Гаврильев, улуус баһылыгын солбуйааччы Филипп Николаев, нэһилиэк инбэлииттэрин уонна бэтэрээннэрин сэбиэтин бэрэссэдээтэлэ Анастасия Семеновна Сысолятина кырыйан балаҕан аанын арыйдылар.
Алгыс сиэрин-туомун В.А.Зырянов аатынан “Сарыал” сынньалаҥ киин директора Геннадий Игнатьев-Айыы оҕото аал уоту оттон айах тутан күндүлээтэ, үтүө-мааны тылларынан бар дьонун арчылаата.
Баһылык Иван Васильевич балаҕан тутуутугар үлэлэспит, саамай күүс-көмө буолбут нэһилиэкпит эр хоһуун дьонноругар махтал суруктары туттарда. Маны таһынан кэрэ көстүүнэн балаҕан иһин киэргэппит далбар хотуттарга, үлэлэспит дьоҥҥо истиҥ тыллардаах махтал суругунан наҕараадалаата. Кэлбит ыалдьыттар эҕэрдэ тыл бастыҥын анаатылар, сэмэй бэлэхтэрин туттардылар. “Күбэйэ” общественнай түмсүү далбар хотуттара, эбээлэрэ дьэрэкээн оһуордаах олбохтору, күбүөрдэри тигэн бэлэх ууннулар. Нэһилиэкпит мецената, спонсора Вячеслав Заболоцкай көмүлүөк оһох тутуутугар бастакынан сэмэй кылаатын киллэрдэ.
Кэлбит ыалдьыттары “Үөдэй нэһилиэгэ” тыа сирин түөлбэтэ салалталаах нэһилиэк түөлбэлэрэ, тэрилтэлэр бары бииргэ минньигэс астаах сандалы остуолу тэрийэн кэлбит ыалдьыттары тото-хана күндүлээтилэр.
Бу күн Үөдэй нэһилиэгин ытык киһитэ, сопхуос чемпион суоппара, өр сылларга инбэлииттэр сэбиэттэрин бэрэссэдээтэлинэн үлэлээбит Константин Константинович Эверстов аатын үйэтитиигэ “Бу орто дойдуга олорон, суолбун хаалларан аастаҕым” араас сылларга нэһилиэк олоҕун сырдатан түһэрбит хаартыскаларынан быыстапка З.П.Саввин аатынан Үөдэй орто оскуолатын “Ийэҕэ албан аат” түмэлигэр үөрүүлээхтик арылынна.
Быыстапканы Константин Эверстов чугас дьонноро нэһилиэкпит ытык кырдьаҕаһа, сэрии кэмин оҕото, Нам улууһун уонна Үөдэй нэһилиэгин ытык киһитэ Мария Гаврильевна Эверстова, СӨ Бочуоттаах архитектора Светлана Семеновна Алексеева аалай кыһыл лиэнтэни кырыйан арыйдылар. Түмэл салайааччыта, краевед Алексей Яковлев Константин Эверстов олорон ааспыт олоҕун, үлэтин, общественнай дьарыгын кэпсээтэ, быыстапка ис хоһоонун сырдатта.
Быыстапкаҕа Константин Эверстов араас сылларга нэһилиэк олоҕун, түмсүүлэрин, тэрилтэлэрин араас хайысхаҕа тэрээһиннэргэ, үөрүүлээх күннэргэ түһэрбит хаартыскалара нэһилиэк олоҕун, дьарыгын, түмсүүлэрин үлэтин, дьонун-сэргэтин хамсаабат күлүккэ арылыччы сырдатта.
Тэрээһин түмүгэ “Бары бииргэ, биир сомоҕо” аахсыйа кэнсиэринэн үрдүк таһымҥа түмүктэннэ.
Кэлбит ыалдьыттар, көрөөччүлэр аахсыйаҕа кыттыһан балаҕанна кылааттарын киллэрдилэр.
Общественность балаҕана нэһилиэкпит дьонун-сэргэтин түмэн, санааларын холбоон, үтүө үлэҕэ көҕүлүүр түмсэр, ытык киин буолан нэһилиэкпит уйгулаах олоҕун тупсарыыга, дьон духуобунай баайын сайыннарыыга улахан суолтаны ылыаҕа диэн эрэнэбит.
Екатерина Эверстова, Үөдэй
Алексей Яковлев хаартыскаҕа түһэриитэ