Нам сэлиэнньэтин үөрэнээччилэригэр оҕоҕо туһуланар “Телефоҥҥа эрэн” диэн иһитиннэрии нэдиэлэтэ бара турар. Дьон-сэргэ, чуолаан оҕо-аймах көмө баарын билэрин туһугар, төрөппүттэргэ, оҕолорго иһитиннэриилэр салҕанан ыытыллаллар.
Билиҥҥи үйэ дьоно кыралыын-улаханныын бары суотабай төлөпүөн илдьэ сылдьабыт. Ааспыт сыл ахсынньы ый 9 күнүттэн анал үөрэҕи ааспыт специалистарга, психологтарга суотабай нүөмэртэн кылгас нүөмэргэ эрийэн тиийэр гына оҥордулар. Киһи өйүгэр хатанар гына үс сыыппараттан турар – 124. Бу нүөмэр дойду үрдүнэн үлэлиир. Манна кимнээх эрийэн тиийиэхтэрин сөбүй? Оҕолор уонна төрөппүттэр.
Киһи олоҕун тухары араас ыарахаттары көрсөр. Ол курдук, санаа кулута буолбут киһи сыыһа-халты туттунуулары оҥоруон эбэтэр быстахха былдьаныан сөп. Маннык түгэн тахсыбатын туһугар анал специалистар, психологтар өҥөлөрө улахан көмөлөөх. Ол эрээри, киһи эрэ барыта бу өҥөнү туттубат. Үгүстэр эрэммэттэр эбэтэр чугаһынан психолог суох буолар.
Уустук балаһыанньаҕа түбэстэххинэ, соҕотохсуйуу санаата мэһэйдиир, санаа тууйуллуутугар киирдэххинэ, өйдөспөт быһыыттан-майгыттан ытыах санаа кэлэр эбэтэр куттал суоһуур. Итинник быһыыга-майгыга түбэстэххитинэ, ыарахан түгэннэргэ киирдэххитинэ 124 нүөмэргэ эрийэн тиийэн көмө ылыаххытын сөп. Кэпсэтии “конфиденциально” буолар диэн эрэннэллэр.
Ол курдук, номнуо, Нам сэлиэнньэтин бары оскуолаларыгар кылаас чаастара, анал муннуктарга листовкалар ыйаннылар. Маны таһынан, Илья Винокуров аатынан Намнааҕы педагогическай колледж устудьуоннарыгар билиһиннэрдилэр. Санатан этэр эбит буоллахха, дойду үрдүнэн оҕолорго биир кэлим 8 800-2000-122 “Телефоҥҥа эрэн” күнүстэри-түүннэри үлэлиир уонна суотабай төлөпүөнтэн 124 нүөмэргэ эрийэн тиийэн сөптөөх көмө ылыахха сөп. Онтон Саха сирин төлөпүөнүн нүөмэрэ – 8 800-100-35-50.
Кылгас нүөмэри 124 бары өйдөөн хаалыахтара диэн эрэнэбит. Ыарахан кэмҥэ 124 нүөмэртэн оҕолорго эбэтэр төрөппүттэргэ сүбэлээн-амалаан, уоскутан, көмөлөһөн биэриэхтэрэ.
Ленскэй нэһилиэк пресс-сулууспата