Маймаҕа олохтоохторо Слепцовтар дьиэ кэргэн өймөкөөннөргө 32 туонна оту босхо, көмө быһыытынан тиэрдэн биэрдилэр. Ыраах айаны аахсыбакка ыал аҕата Петр Николаевич оту бэйэтин техникаларынан илдьэн туттарда.
Бу эдэр ыал Слепцовтар кэтэх хаһаайыстыба 2013 сыллаахтан тэринэн сыспай сиэллээҕи иитиинэн дьарыктанар. Ол эрээри былырыын 2024 сылга сааскы халаан уутугар 100-тэн тахса төбө сылгыларын сүтэрбиттэрэ. Айылҕа алдьатыылаах содулуттан бүдүрүйбэккэ, көрүллүбүт өйөбүлү, көмөнү тирэх оҥостон этэҥҥэ кыстыгы туораабыттара.
Быйыл сайын барыта 90-ча туоннаны оттоотулар. Үүнүү орто дииллэр. Онон хотуулаахтык оттоон, күөх быйаҥы сомсон Өймөкөөн ууга барбытыгар, кыһалҕалаахтарга көмөлөһөргө санаммыттар.
«Үтүө үтүөнэн төлөнөр» дииллэринии, былырыыҥҥы алдьатыылаах халаан кэнниттэн Нам улууһугар үтүмэн көмө кэлбитэ, оҥоһуллубута умнуллубат.
Өбүгэлэрбит этэллэрэ — ынах үүтэ тылыгар диэн. Онон хоһооҥҥо хоһуллар нал, нүөл Наммыт сирэмигэр, Эҥсиэлибит хочотун эриэккэс сирин-буорун, уутун иҥэринэн үүммүт күөх суугун оппут, ыраах тымныы чыпчаалынан аатырбыт ытык Өймөкөөн хороҕор муостаахтарыгар, сыспай сиэллээхтэригэр иҥэмтиэлээх буоллун.
«Эҥсиэли» хаһыат