Биир дьиэ кэргэнтэн Нам улууһуттан Аҕа дойду көмүскэлигэр кыттыбыт буойуттары үйэтитэр ,,Мэҥэ таас» 10-с тома бэчээккэ бэлэмнэнэр. Манна нэһилиэк аайыттан ханнык дьиэттэн хас киһи сэриигэ сылдьыбыта чуолкайданан киириэхтээх.
Салбаҥ нэһилиэгиттэн 4 ини-бии Мокрощуповтар туһунан сиэн балыстара, Нам олохтооҕо Варвара Павловна Барамыгина:
Биһиги ийэбит Мокрощупова Мотрена Петровна бииргэ төрөөбүттэр 12-лэр эбит, онтон 7 оҕо тыыннаах хаалбыт. Олортон Мария диэн эдьиийэ улаатан баран ыалдьан өлбүт. Никифор — 1910 с., Дмитрий — 1912 с., Тит — 1920 с., ийэбит Мотрена — 1922 с., Федор — 1925 с., Афанасий — 1927 с. төрөөбүттэр.
Ийэлэрэ Мокрощупова Мария Николаевна аас-туор олохтон эрдэ өлөн, аҕалара Мокрощупов Петр (Ньорбо) кыһалҕаттан икки уолун Тити уонна Федоры аймахтарыгар иитиигэ биэрбит. Бу Мокрощуповтар дьиэ кэргэнтэн 4 улахан уоллара сэриигэ ыҥырыллыбыттар.
Улахан уол Никифор 1941 с. сэрии саҕаланаатын кытта ыҥырыллыбыт уонна 1942 сыл атырдьах ыйыгар улаханнык бааһыран төннөн кэлбит («илиитэ суох» диэн ааттаммыт). Кини Салбаҥҥа олорон 1970с. өлбүтэ.
Дмитрий эмиэ 1941 сылга ыҥырыллыбыт уонна ол сыл өлбүт. 3-с уол Тит, иитиллибитинэн Захаров, Салбаҥ «Коммунизм» холкуоһуттан 1941с. атырдьах ыйын 23 күнүгэр ыҥырыллан барбыт уонна 1945с. БМ АССР Горхон с. өлбүт.
Федор, иитиллибитинэн Харлампьев, 1941с. ыҥырыллыбыт, 1943 с. эргиллибит. 1951 с. Хамаҕаттаҕа олорон хомолтолоохтук өлбүт.
Ийэбит Мотрена Петровна олоҕун устата ыанньыксытынан үлэлээбитэ. Сэриигэ баран өлбүт бииргэ төрөөбүт убайдарын олус аһыйара, харааста ахтара. Дьоммун кэриэстээн быйыл Кыайыы 80 сыллаах параадыгар Салбаҥ нэһилиэгин дьонун кытта таайдарым, ийэм мэтириэттэрин тутан сэлэлии хаамыстым, Кыайыы күнүн сыл аайы долгуйа көрсөбүн.
Мария Винокурова