Бүгүн Н.С. Охлопков аатынан Нам улуустааҕы гимназиятыгар сайыҥҥы сынньалаҥ кэнниттэн Билии күнүгэр анаммыт линейкаҕа оҕолор үөрэ-көтө, учууталлар, төрөппүттэр сүргэлэрэ көтөҕүллэн муһуннулар. Саҥа үөрэх дьыла саҕаламмытынан, Билии күнүнэн эҕэрдэлэрин тиэртилэр: дириэктэр Александр Новгородов, Нам улууһун баһылыга Юрий Слепцов, социальнай-психологическай арыаллааһын киин дириэктэрэ Эдита Софронова, Ленскэй нэһилиэк ТСТ баһылыгын солбуйааччы Тимофей Охлопков, НУГ выпускнига, быйыл М.К. Аммосов аатынан ХИФУ-ну бүтэрэн “Бастакылар хамсааһыннарын” Нам отделениетыгар үлэтин саҕалаабыт Алексей Сыромятников. Гимназистарга саҥа ситиһиилэри, айымньылаах үлэни баҕардылар.
Быйыл Нам улуустааҕы гимназиятыгар 315 оҕо үөрэнэр. 5 “а” кылааска 20 (кыл.сал. Л.Н.Павлова), 5 “б” 19 оҕо (кыл.сал. Т.И. Седалищева) үөрэнэ киирдилэр. Мантан антах кинилэр гимназист аатын үрдүктүк сүгүөхтэрэ. Гимназия 11 “а” кылааһыгар 20 (кыл.сал. И.Е. Колесова), 11 “б” 17 оҕо (кыл.сал. А.М. Попова) үөрэнэллэр. Быйыл кинилэргэ улахан эппиэтинэстээх саҥа үөрэх дьыла саҕаланна.
Үөрүүлээх линейка бэлиэ түгэнинэн 14 саастарын туолбут оҕолорго РФ гражданина буолалларын туоһулуур паспорт туттарыыта буолла. Артур Бурцевка, Виолетта Атласоваҕа, Айанесса Жирковаҕа, Аяна Колмогороваҕа ыччаты кытта үлэлиир специалист Алексей Сыромятников үөрүүлээх быһыыга паспордары туттарда. Ону сэргэ куонкуруска кыайыылаах тахсан 200 тыһ.солк. суумалаах граны ылбыттарын туоһулуур диплому 9 “а” кылаас салайааччытыгар Е.С. Алексееваҕа туттарда. Үөрэммит гимназиятыгар сэмэй бэлэҕин утары уунна.
11 кылаас үөрэнээччилэрэ Бүтүн Россиятааҕы “Навигатор детства” бырайыак чэрчитинэн “Кэлэр кэм сөмөлүөтэ” акцияҕа кыттыһан гимназия боруогун атыллаабыт 5 кылаастарга баҕа санааларын суруйбут, кумааҕыттан оҥорбут сөмөлүөттэрин бэлэхтээтилэр.
Бүтүн дойдубут үрдүнэн “Герой паартата” бырайыак аан бастаан былырыын балаҕан ыйын 1 күнүгэр саҕаламмыта. Ол чэрчитинэн ааспыт сыллаахха бэлиэтэммит Билии күнүгэр Нам улуустааҕы гимназиятын 1998 сыллаах выпускнигар, “Лидер года” бириэмийэ меценатыгар, анал байыаннай дьайыы кыттыылааҕар Василий Владимирович Афанасьевка бастакынан “Герой паартата” турбута. Быйыл иккис “Герой паартата” гимназияҕа үөрэммит анал байыаннай дьайыы кытыылааҕар Раймонд Васильевич Острохонскайга ананна.
Үөрүүлээх линейкаҕа 11 кылаас үөрэнээччилэрэ Уйгун Дьячковскай, Кристина Гуляева 5 кылаас үөрэнээччилэрин Тимур Белолюбскайы, Ангелия Максимованы кытта саҥа үөрэх дьыла аһыллыбытын кэрэһэлиир алтан чуорааны чугдаартылар.
Алтан чуораан саҥа үөрэх дьылыгар үтүмэн үгүс билиини сомсорго, общественнай үлэҕэ көхтөөх буоларга ыҥырда.
Касьян Олесов-Олук
Видео Роман Шапошников