Быйыл муус устарга Ил Дархан Айсен Николаев кыттыылаах үлэҕэ киирбит Нам киин балыыһатын саҥа эмтиир корпуһа үлэтин үрдүк көдьүүстээҕин көрдөрөр. Медицинскэй тэрилтэ үлэтин саҕалыаҕыттан 936 ыарыһахха көмө оҥордо. Саҥа усулуобуйаҕа 128 эпэрээссийэ ыытылынна, 2161 диагностическай чинчийии оҥоһулунна. Балыыһа иһигэр баар суһал көмө сулууспата 3863 ыҥырыыга сылдьыбыт. Бу туһунан СӨ Доруобуйа харыстабылын министерствота иһитиннэрэр.
Саҥа корпус 3700 квадратнай миэтэрэ иэннээх, 50 куойкалаах, үс этээстээх толору хааччыллыылаах дьиэ буолар. Балыыһа үлэҕэ киириитэ өр сыллаах кыһалҕаны быһаарбыта: урут стационарнай көмө икки эргэрбит дьиэҕэ оҥоһуллар этэ, олортон биирэ аварийнай туруктаах диэн бигэргэтиллибитэ.
Саҥа эбийиэк аныгылыы былаана медицинскэй көмөнөн толору хааччыйар кыаҕы биэрэр. Ол курдук, бастакы этээскэ диагностическай сулууспа, суһал көмө уонна акушерскай-гинекологическай отделениелара бааллар. Иккис этээскэ – терапия уонна реанимация отделениелара. Үһүс этээскэ – эпэрээссийэлиир блок уонна хирургическай отделение.
Тэрилтэ 170 аныгы медицинскэй оборудованиелаах, ол иһигэр рентгеновскай комплекс, экспертнэй кылаастаах УЗИ аппарааттара, рентгенохирургическай С-дугалаах, ону таһынан реанимационнай уонна анестезиологическай оборудованиелардаах. Маннык хааччыллыы көмөтүнэн Нам быраастара диагностика уонна эмтиир хаачыстыбаны үрдэттилэр уонна миэстэтигэр уустук эпэрээссийэлэри ыытар кыахтаннылар. Ыарыһахтар республикатааҕы медицинскэй кииннэргэ барар наадаттан босхолоннулар.
«Номнуо тыһыынча кэриҥэ киһи табыгастаах, куттала суох усулуобуйаҕа үрдүк хаачыстыбалаах көмөнү ылла. Быраастар 128 эпэрээссийэни, тыһыынчанан диагностическай чинчийиини уонна суһал көмөнү оҥороннор, Нам улууһун олохтоохторун доруобуйаларын тупсардылар, олохторун быыһаатылар», — диэн доруобуйа харыстабылын миниистирэ Лена Афанасьева иһитиннэрдэ.
Кэлиҥҥи биэс сылга Саха республикатыгар доруобуйа харыстабылын сайыннарыы федеральнай уонна региональнай программаларын чэрчитинэн 130-тан тахса медицинскэй эбийиэк үлэҕэ киирдэ. Аныгы кэмҥэ эппиэттир балыыһалары, поликлиникалары уонна фельдшерскэй-акушерскай пууннары тутуу региоҥҥа доруобуйа харыстабылын сайыннарыы сүрүн көрүҥэ буолар.
Бэйэ информ.