ГИМС үлэтин сүрүн соругунан ууга дьон сэрэхтээх буолууларын хааччыйыы, нэһилиэнньэҕэ куттал суох буолуутун хонтуруоллуур, тэрийэр үлэ буолар. Уу объегар өрүс эрэ буолбакка, күөллэр, үрэхтэр эмиэ киирэллэр. ГИМС үлэһиттэрэ уу объектарыгар хонтуруоллуур (надзордуур), патруллуур, сэрэтэр-харыстыыр, өйдөтөр үлэни ыыталлар.
Иннокентий Осипов, ГИМС салайааччыта, старшай инспектор:
— Уу улахан объектара билигин мууһунан саҥа бүрүллэн эрэллэр, өссө да мууска киирэр эрдэ. Ол үрдүнэн, куйаар ситимигэр оҕолор хаҥкылыы сылдьар, балыксыттар күргүөмүнэн мууска тахсар видеолара тарҕанар. Билигин муус өссө да чараас, дьон олоҕор кутталлаах. Сатыы мууска киирэр сэрэхтээҕин умнумаҥ, мууһунан сырыы көҥүллэнэ илигинэ транспорт ханнык да көрүҥүнэн мууһунан айанныыр булгуччу көҥүллэммэт. Өрүһү туоруур сирдэргэ турар информационнай бэлиэлэргэ болҕомтолоох буолуҥ.
Бу кэмнэргэ ЫБММ ГИМС инспектордара, быыһааччылар, ИДьМ уонна административнай хамыыһыйа кыттыылаах рейдэлэри ыыталлар.
Чараас мууска киирии иһин, СӨ Административнай быраабы кэһии туһунан кодексатын 3.6 ыст. олоҕуран, административнай эппиэтинэс уонна ыстараап көрүллэрин санаталлар:
Гражданнарга: 500 солкуобайтан 5 000 солкуобайга диэри.
Дуоһунастаах сирэйдэргэ: 5 000 солкуобайтан 50 000 солкуобайга диэри.
Юридическай сирэйдэргэ: 5 000 солкуобайтан 50 000 солкуобайга диэри.
Массыынанан мууска киирии иһин, СӨ Административнай быраабы кэһии туһунан кодексатын 9.10 ыст. олоҕуран, административнай эппиэтинэс уонна ыстараап көрүллэр:
Гражданнарга: 3 000 солкуобайтан 5 000 солкуобайга диэри.
Дуоһунастаах сирэйдэргэ: 20 000 солкуобайтан 50 000 солкуобайга диэри.
Юридическай сирэйдэргэ: 100 000 солкуобайтан 1 000 000 солкуобайга диэри.
Быһылаан тахсыбатын туһугар сэрэхтээх буолуҥ. Бэйэҕитин уонна чугас дьоҥҥутун харыстааҥ!
Семен Аргунов
Хаартыскалар: Иннокентий Осипов тиксэриитэ