Нам улууһугар ыам ыйын 22 күнүттэн 24 күнүгэр диэри «Мир! Май! ГТО!» Бүтүн Россиятааҕы акция чэрчитинэн өрөспүүбүлүкэтээҕи фестиваль буолбута иккис күнэ. Быйылгы фестиваль Россияҕа аҕа дойдуну көмүскээччи, Саха сиригэр Ийэ дойдуну көмүскээччи сылларыгар ананна.
А. Игнатьев аатынан стадиоҥҥа, КСК-ҕа сарсыарда 10 чаастан киэһэ 5 чааска диэри ГТО нормативын кэлэн туттараллар. Манчаары оонньуутугар күрэхтэһэр спортсменнарга, «Спортивные якутяне» өрөспүүбүлүкэтээҕи үөрэнээччилэр спартакиадаларыгар кыттар оҕолорго булгуччулаах. Итиэннэ, кыра оҕотуттан саҕалаан хас биирдии киһи, дьиэ кэргэнинэн, коллективынан кэлэннэр ГТО туттара сылдьаллар.
Иван Яковлев, «Лидер» МАУ спорт киинин салайааччыта:
— ГТО туттарааччылар идентификационнай нүөмэр (УИН) ылар туһуттан хайаан да анал сыһыарыыга киирэн регистрацияны ааһыахтарын наада. Идентификационнай нүөмэрэ суох дьоҥҥо ГТО түмүгэ аахсыллыбат. Хас биирдии киһи түмүгэ порталга киллэриллэр.
Иккис күммүтүгэр дьон сылдьыыта үгүс. Бүгүн үөрэнээччилэр спартакиадаларыгар кыттар 70-ча оҕо кэлэн туттарда. Улууспут, Ленскэй нэһилиэк дьаһалталарын коллектива, онтон да атын тэрилтэ үлэһиттэрэ кэлэннэр кыттыыны ыллылар. Бэҕэһээ Бөтүҥ оскуолатын үлэһиттэрэ күргүөмүнэн кэлэн туттардылар. Дьон ГТО нормативын ыарахан курдук саныыллар, ол эрээри кэлэн кыттыбыт дьон олус ыарахана суоҕун бэлиэтээтилэр. Сорох тэрилтэлэргэ коллектив дуогабарыгар киллэрэн уоппускаларын күнүгэр төлөбүрдээх 2 күнү эбэн биэрэллэр эбит, ону таһынан нолуокка барбыт үптэн харчы төннөр. Итиэннэ, оскуоланы бүтэрээччилэр биир кэлим экзаменын уопсай баалыгар эбии баал эбиллэр. Онон интэриэс улаатан иһэрэ көстөр.
«Мир! Май! ГТО!» өрөспүүбүлүкэтээҕи фестиваль сарсыҥҥы күнүнэн түмүктэнэр. Улууспут дьоно-сэргэтэ түгэни мүччү тутумаҥ. Ол эрээри ГТО туттарыыта манан тохтоон хаалбат, хаһан баҕарар портал нөҥүө сайаапка суруйан туттарыахха сөп.
Семен Аргунов