Хамаҕатта нэһилиэгин биир тарбахха баттанар оһуохай этээччитинэн Александр Николаевич Федоров буолар. Үөрүүлээх, өрөгөйдөөх түгэннэргэ оһуохайдаан түһүлгэ таһаарарын, ылбаҕай ырыатынан-тойугунан ситэрэн,киэргэтэн биэрэрин “Түһүлгэ” норуот айымньытын киинин дириэктэрэ Антонина Харитонова:
“Александр Николаевич көрбүтүн-истибитин тута хоһуйар, тылыгар тиһэр бастыҥ этээччибит. Кини оһуохайа ыһыахтарбыт ис хоһоонун өрүү ситэрэн-толорон биэрэр, айыылары кытта ситимниир,сиэри-туому ыытар улаханнык ытыктыыр аҕам киһибит буолар”.
Александр Николаевич Ньурба (Ленинскэй)оройуонун Малдьаҕар нэһилиэгиттэн төрүттээх. Аҕа дойду сэриитин бүтэһик сылыгар төрөөбүт буолан, оҕо сааһа сэрии кэннинээҕи ыарахан сылларга ааспыта. Кини Малдьаҕар аҕыс кылаастаах оскуолатын бүтэрэн аармыйаҕа сулууспалаабыта, уол оҕо кэккэтинэн ытык иэһин толорбута. Ол кэннэ Дьокуускайдааҕы тыа хаһаайыстыбатын техникумугар лесник-техник идэтигэр үөрэнэ киирбитэ. Үөрэнэ сылдьан аналынкөрсөн, ыал буолан, оҕо-уруу тэнитэн Нам Хамаҕаттатыгар олохсуйан олорор. Александр Николаевич өр сылларга Нам оройуонун ойуурун хаһаайыстыбатыгар бочуоттаах сынньалаҥҥа тахсыар диэри маастарынан үлэлээбитэ.
Александр Федоров — ырыаһыт, тойуксут, оһуохайдьыт. Оҕо эрдэҕиттэн оһуохайдьыттары батыһа сылдьын истэн, сэҥээрэн улааппыт. Эдэр сааһыттан ырыа кэрэ эйгэтин кытта алтыһан араас тэрээһиннэргэ нэһилиэгин дьонугар айылҕаттан бэриллибит куолаһынан ыллыыр, элбэх фестивалларга кыттар. Маны таһынан сахалыы туойар талаанынан фольклор биир уустук көрүҥүн толорор, оһуохай таһааран саха төрүт культуратын пропагандалыыр. Нэһилиэккэ буолар ыһыахтарга, өрөгөйдөөх күннэргэ алгыс туомун толорооччунан, оһуохай этээччинэн ыҥырыыга сылдьар ытыктабыллаах алгысчыт, оһуохайдьыт. Бары культурнай тэрээһиннэргэ көхтөөх кыттыытынан сыана бэтэрээнин аатын ылбыта, “Түһүлгэ” норуот айымньытын киинин “Хамаҕатта нэһилиэгин культурата сайдыытыгар кылаатын иһин” үрүҥ көмүс бэлиэнэн 2023 сыллаахха Нэһилиэк күнүгэр наҕараадаламмыта. Хамаҕатта нэһилиэгин Ытык киһитигэр, сэрии сылын оҕотугар Александр Николаевичка фольклор специалиһа Оксана Кудрина Оһуохайкүнүнэн эҕэрдэтин аныыр: «Сахабыт сиригэр бүгүн Оһуохай күнэ бэлиэтэнэринэн истиҥник эҕэрдэлиибин! Сахаларга өй-санаа бииргэ түмсэр төрүт үҥкүүбүтүн — оһуохайы харыстааһыҥҥа уонна киэҥ эйгэҕэ тарҕатыыга кылааккар махтанабыт!».
Мария Винокурова