Дьокуускайга Нам улууһун күннэрин чэрчитинэн, Ю.И. Слепцов Нам устудьуоннарын кытта көрүстэ.
Көрсүһүү биир дойдулаахпыт, Нам 2-с нүөмэрдээх оскуолатын выпускнига Айыллаан Винокуров салайар волонтер киинигэр буолан ааста.
Тэрээһин сүрүн сыала — Намтан төрүттээх устудьуоннар ассоциацияларын тэриллиитэ (АСНУ) уонна онно бэрэссэдээтэл талыы.
Кэпсэтиигэ кадровай политика, Нам улууһун вакансиялара, устудьуоннар түмсүүлэрэ, урбаан уо.д.а боппуруостар таарылыннылар.
Олус элбэх устудьуон кэлэн көхтөөхтүк кытынна. Нам улууһун уонна нэһилиэктэр баһылыктарын кытта кэпсэттилэр, интэриэһиргиир боппуруостарыгар хоруй ыллылар. Куоластааһын түмүгүнэн ХИФУ 1 куурсун устудьуона Лидия Егорова АСНУ бэрэссэдээтэлинэн талылынна.
Тэрээһин кэннэ Айыллаан Винокуров үлэтин билиһиннэрдэ:
“Мин Нам 2 нүөмэрдээх оскуолатын бүтэрбитим, дьонум Партизаннар. Добровольчество, волонтерство диэн үтүө санаа, үтүө санаа диэн биһиэхэ, сахаларга, урут уруккаттан баар. Билиҥҥи үйэҕэ волонтерство диэн дьоҥҥо эрэ көмө буолбакка, араас тэрээһиннэргэ: спортивнай күрэхтэргэ, оонньууларга, кэнсиэрдэргэ көмө эмиэ буолар. Ону кытта, анал байыаннай дьайыыга сылдьар биир дойдулаахтарбытыгар көмөҕө волонтердар оруоллара эмиэ улахан. Добровольческай хамсааһын биһиги түмсүүбүтүн көрдөрөр.
Биһиги волонтер кииммит ыччат министиэристибэтин көҕүлээһининэн “Азия оҕолоро” спортивнай оонньууларыгар көмө диэн 2011 сыллаахха тэриллибитэ. Бүгүҥҥү күҥҥэ дылы волонтер хамсааһыннарбыт араас хайысхаларыттан ыччаттар мустан волонтер киин буолан үлэлии сылдьабыт.
Урукку сылларга биһиги кииммитигэр эдэр ыччат эрэ үлэлиир этэ: улахан кылаас оҕолоро, устудьуоннар, эдэр үлэһит дьон. Кэнники кэмҥэ орто уонна аҕам саастаах волонтердар бэйэлэрин баҕаларынан кэлэн үлэбитигэр кытталлар.
Мин устудьуоннуу сылдьан активист буолан бүгүн тэриллибит АСНУ-га олус “ыалдьабын”. Наммыт ыччата түмсүүлээх буоллун диэн сыаллаах тэрилиннэ. Ону кытта, волонтер кииммит үлэтигэр кыттыһыннарыахпыт, күүс-көмө буолуохпут.”
Дарина Константинова