Намнааҕы “Тэтим” общественнай бөлөх кыттааччылара алтынньы 22 күнүгэр Т.К. Ядрихинская аатынан социальнай-геронтологическай киин олохтоохторун кытта көрсөн, истиҥ сылаас сыһыаннарын дэлэйдик үллэһиннилэр.
“Тэтим” бөлөх олохтоохторго киэҥ программалаах ыалдьыттаатылар:
“Заряд бодростью” — алыптаах муусука кэрэ эйгэтинэн эмтэнии, үҥкүү-битии, араас тэтимнээх эрчиллиилэр.
“Погружение в творчество” — оҕуруонан маастар-кылаас. Аҕам саастаах дьон дуоһуйа оҕуруолары таланнар, кэпсээннэрин үллэстэн, кэрэ киэргэллэри оҥордулар.
“Живое общение” – ирэ-хоро кэпсэтии, сибээстэри ситимнээһин. «Тэтим» бөлөххө киин доҕотторо: көрбөттөр уопсастыбаларын чилиэннэрэ, «Ипподром» түөлбэ олохтоохторо, «Хардыы» скандинавскай хаамыы общественнай бөлөҕө, маастар-кылаастарга волонтер В.В. Попова бааллар.
“Поддержка и тепло” — киин олохтоохторо уруккуттан сылдьар волонтердары куруук кэтэһэллэр, маннык тэрээһиннэр кинилэргэ бигэ туругу, обществоҕа наадалаах буолуу санаатын үөскэтэллэр. Волонтердар өрүү илии тутуурдаах, өттүк харалаах кэлэр үгэстэрин бу да сырыыга умнубатылар, олохтоохторго мүөт, сугун кэһиилээх кэлбиттэр. Ааспыт сыллар тухары бииргэ үлэлэһэн кэлбит дьону олохтоохтор доҕотторун курдук үөрэ-көтө көрсөллөр.
“Трогательный душевный порыв” — дууһа сылааһын үллэстэргэ, бэйэ-бэйэни өйдөһөргө-өйүүргэ анаммыт терапия. Эр дьон оҥорбут киэргэллэрин сонно тута кэрэ аҥардарга бэлэхтээтилэр.
Маннык түгэннэргэ киһиэхэ болҕомто, дьону кытта тыыннаах алтыһыы наадатын өдүүгүн. Киин олохтоохторугар, чуолаан кырдьаҕас киһиэхэ, обществоҕа наадалаах эбиппин диэн санаа үөскээн, санаалара көтөҕүллэр.
Бу күн биһигин кытта буолбут хас биирдии волонтерга сылаас сыһыаҥҥытыгар, истиҥ көрсүһүүгүтүгэр улахан махтал тылларын аныыбыт.
Мария Матвеева