Олунньу 28 күнүгэр С.Н. Донской-II аатынан үөрэх сайдыытын уонна квалификацияны үрдэтэр институкка «Начальное образование-2025» IV-с өрөспүүбүлүкэтээҕи учууталлар хамаанданан куонкурустара буолла. Куонкуруска барыта 208 учуутал сайаапка биэрбит.
Дистанционнай олимпиада түмүгүнэн, 10 бастыҥ хамаанда талыллан түмүктүүр түһүмэххэ күөн көрүстүлэр. Ол курдук, Дьокуускайтан 5 үөрэх кыһата, Бүлүүттэн, Хаҥаластан, Тааттаттан уонна биһиги улууспутуттан И.Д. Винокуров-Чаҕылҕан аатынан Нам алын сүһүөх оскуолата кытыннылар. Хамаандалар 3 түһүмэҕинэн күрэстэстилэр. Бэйэлэрин уонна хамаандаларын билиһиннэрдилэр, методическай холбоһук мастарыскыайыттан сиһилии кэпсээтилэр, интерактивнай үөрэхтээһин ньымаларын, алын сүһүөх үөрэнээччитэ толкуйдуур, суруйар дьоҕурдарын, уруок таһынааҕы дьарыктары уо.д.а. үөрэх көрүҥнэрин холобурдаан көмүскээтилэр.
Бу үс түһүмэх түмүгүнэн, муҥутуур кыайыылааҕынан биһиги улууспут хамаандата – И.Д. Винокуров-Чаҕылҕан аатынан Нам алын сүһүөх оскуолата ааттанна. Биһиги учууталларбыт патриотическай иитиигэ «Кэриэстиир Эбээһинэһи Сүгүөххэ» (КЭС), «Кыайыы сиэннэрэ», «Кыайыыга кынаттаабыт ырыалар», «Саллаат туһунан кинигэни аах», «КЭС дневнигэ», «КЭС альбома» бырайыактарын көмүскээтилэр.
Кыайыылаах хамаандаҕа алын сүһүөх оскуола учууталлара В.Д. Евсеева, Л.П. Максимова, А.Н. Неустроева, С.Н. Николаева киирэн улуус, оскуола чиэһин дьоһуннук көмүскээтилэр. «Начальное образование-2025» бүтүн өрөспүүбүлүкэтээҕи куонкуруска И.Д. Винокуров-Чаҕылҕан аатынан Нам алын сүһүөх оскуолата муҥутуур кыайыылаах аатын ылан, бастыҥ үөрэх кыһата буоларын өссө төгүл дакаастаата.
Бэйэ информ.