Балаҕан ыйын 3 күнүгэр, Бойобуой Албан Аат уонна иккис Аан дойду сэриитэ түмүктэммит күнүгэр түбэһиннэрэн, улуустааҕы Николай Рыкунов аатынан кииннэммит библиотекаҕа “Мэҥэ таас” мемориал-кинигэ 10 тома сүрэхтэннэ.
Бу кинигэ Кыайыы 80 сылынан Аҕа дойду уодаһыннаах сэриитигэр биир дьиэ кэргэнтэн сэриигэ ыҥырыллан сылдьыбыт ини-биилэр үтүө ааттарын, кинилэр ийэлэрин-аҕаларын үйэтитэргэ ананан тахсыбыт. Улуус нэһилиэктэрэ бары улуустааҕы бэтэрээн сэбиэтин председателэ Софья Кобякова салайыытынан матырыйаал хомуйбуттарын, улахан редколлегия түмэн таһаарбыт.
Хамаҕатта нэһилиэгиттэн Ийэ дойду көмүскэлигэр 21 дьиэ кэргэнтэн 46 ини-биилэр барбыттара. Олор истэригэр үстүү бииргэ төрөөбүттэр Гаврил, Ефим, Петр Иванович Аргуновтар, Гаврил, Егор, Николай Дмитриевич Пермяковтар, Иван, Иннокентий, Тарас Петрович Суздаловтар, Федот, Николай, Степан Дмитриевич Гаврильевтар. Ону таһынан 17 ыалтан иккилии ини-бии уолаттар уоттаах сэриигэ сылдьыбыттара. 21 киһи тыыннаах эргиллибитэ, 24 буойун сэрии толоонугар хаалбыта, төрөппүттэрэ хара суругу туппуттара… Попов Алексей Егорович 1908с.т. 1942 сыл атырдьах ыйын 17 күнүгэр фроҥҥа ыҥырыллыбыта эрэ биллэр уонна күн бүгүнүгэр диэри туох да көстүбэтэ.
“Мэҥэ таас” кинигэҕэ киирбит ини-биилэр аймахтарыттан кэлэн биһирэмҥэ кыттыыны ыллылар. Хамаҕатта нэһилиэгиттэн Парасковья Бурнашева аҕатын Семен, абаҕатын Никита Петрович Жирковтар туһунан кэпсээтэ. Маргарита Мухина таайдарын Илья, Петр Васильевич Мальцевтар, аймаҕа Роман Мальцев туһунан презентациянан көрдөрдө. Лидия Кудрина абаҕаларын Роман, Федор Васильевич Кудриннар бойобуой суолларын үөрэппитин сырдатта. Варвара Барамыгина Салбаҥтан төрүттээх түөрт ини-бии таайдарын Никифор, Дмитрий, Тит, Федор Петрович Мокрощуповтары билиһиннэрдэ.
Ити курдук, уоттаах сэрии кыттыылаахтарын сыдьааннара ыалдьыттаатылар, түгэнинэн туһанан чугас дьоннорун долгуйа аҕыннылар. Нэһилиэк баһылыга Евгений Ушницкай кыраайы үөрэтээччилэригэр Николай Захаровка, Мария Винокуроваҕа, Алена Аммосоваҕа эҕэрдэтин анаата.
Презентация кыттыылаахтара бары кинигэ бэлэх тутан, “Спасибо деду за Победу!” өйдөбүнньүк лентаны иилинэн, кинигэҕэ үлэлэспит дьоҥҥо махтанан тарҕастылар.
Мария Винокурова