Аппааны бөһүөлэгин “Чороон” норуот айымньытын киинигэр олунньу 26 күнүгэр нэһилиэк тэрилтэлэрин ыччатыгар анаан Улуу Кыайыы 80 сылын көрсө “Мы будущее” квест-оонньуу ыытылынна. Күрэххэ нэһилиэкпит түөрт тэрилтэтэ кытынна. Күрэх “Чороон” НАК уонна Хатыҥ Арыы нэһилиэк олохтоох дьаһалта көҕүлээһиннэринэн ыытылынна.
Нэһилиэк баһылыга Иван Ноговицын ыччаттарга ситиһиини баҕаран туран эҕэрдэ тылын эттэ. Хатыҥ Арыытааҕы А.Н. Алексеева аатынан врачебнай амбулаторияттан фельдшер Уйгун Беленков хамандыырдаах Юлия Павлова, Анастасия Попова, Михаил Никитин «Амиадорон» хамаанда; Хатыҥ Арыы нэһилиэгин олохтоох дьаһалтатыттан сир исписэлииһэ Эдик Марков хамандыырдаах Туяра Николаева, Сахаяна Слепцова, Ксения Гуляева «Сэкта» хамаанда; И.Е. Винокуров аатынан Хатыҥ-Арыы орто оскуолатыттан нуучча тылын уонна литературатын учуутала Саргылана Павлова хамандыырдаах Мария Борисова, Наталия Винокурова, Марианна Исакова, Сайыына Дьяконова «Сулус» хамаанда; 2-с №-х «Сандаара» оҕо уһуйааныттан харабыл Владимир Власов хамандыырдаах Татьяна Стрекаловская, Валентина Дьяконова, Алина Петрова «Сандаара» хамаанда кытыннылар.
Квест-оонньуу сэттэ тохтобулунан ыытылынна. Бастакы тохтобул «Ребус» ыытааччы Нюргуяна Адамова; иккис тохтобул «Хореография» ыытааччы Варвара Иванова; үһүс тохтобул «Тест» ыытааччы Виталий Евсеев; төрдүс тохтобул «Военный хор» ыытааччы Горьяна Стрекаловская; бэһис тохтобул «Своя игра» Алена Соловьева; алтыс тохтобул «Библиотека» ыытааччы Моника Евстафьева; сэттис тохтобул «Музейная» ыытааччы Марианна Винокурова.
Хамаандалар бары көһө сылдьан хас биирдии станция соругун толордулар. Ол курдук Аҕа дойду сэриитигэр анаммыт викторина боппуруостарыгар уонна тестарыгар эппиэттээтилэр. И.Д. Винокуров-Чаҕылҕан ырыатын ыллаатылар, сэрии кэминээҕи «Катюша» үҥкүүтүн үҥкүлээтилэр, өйдөрүн көрдөрөн кистэммит пазлы хомуйдулар.
Түмүгэр, 614,5 очукуолаах «Сандаара» хамаанда, иккис миэстэни 494,5 очукуолаах «Сулус» хамаанда, үсүһү 473 очукуолаах «Сэкта» хамаанда ыллылар. Кыайыылаах хамаандаларга грамота, кыттааччыларга сертификат уонна муҥутуур кыайылаахха кубок туттарылынна.
Олохтоох дьаһалта ыччатын исписэлииһэ Моника Евстафьева нэһилиэк ыччатын түмэн күүстээх үлэтин саҕалаабытынан эҕэрдэлиибит уонна үлэтигэр үрдүк ситиһиилэри, чыпчааллары баҕарабыт.
Надежда Сивцева